Dërguar me email
në adresën e redaksisë
Po dëgjoja me vëmendje znj.Mesila Doda në debatin tek “5 pyetje nga Babaramo”. Me gjithë respektin për individualitetin e zonjës nuk arrij të kuptoj lidhjen mes zgjedhjes së lirë dhe detyrimeve shifrore. Vetëm duke marrë shembull SHBA-të si kampione të demokracisë nuk mbaj mend që 50 për qind e presidentëve të jenë femra. Përkundrazi, me sa kam lexuar deri më sot nuk ka pasur asnjë femër presidente. Merkeli apo Theçeri kanë dalë të suksesshme në krye të shteteve përkatësve, jo në emër te shifrave detyruese, por të aftësive personale. Ky perceptim që ka në themel thelbin e demokracisë është jetik. I afti, i zoti apo e zonja duhet të dalë aty ku e meriton në sajë të meritave e jo të gjinisë. Ndryshe do kalonim në regres zhvillimor. Një femër apo dhe një mashkull që ka të sigurt 50 përqindëshin i bie që të humbë atë që është thelbësore në një sistem demokratik, konkurrencën e ndershme pa privilegje. Sistemi i sotëm është sistem i aftësive dhe lidhet me aftësitë individuale. Për mendimin tim çdo shifër paracaktuese apo analitike ka dozën e vet të paragjykimit. Për kohën që jetojmë është edhe e dëmshme. Nuk kemi as unë e as burra të tjerë me të cilët kam biseduar nënvlerësim për seksin tjetër, përkundrazi, por është kohë e meritës dhe e aftësive. Të vlerësojmë pikërisht këto duke anashkaluar shifra fasadë e propagandistike. Në një vend si i yni ku pas numrit një nuk ekziston asnjë numër tjetër, më duket një farsë demagogjike pa ndonjë vlerë. Përshëndes DITËN! Profeti.