Sot është 8 dhjetori, Dita e Rinisë. Kreu i Partisë Socialiste, Edi Rama, zhvilloi një takim me të rinjtë, për të përkujtuar këtë datë, e cila 22 vjet më parë shënoi nisjen e kthesës së madhe që do të merrte vendi, duke u shkëputur nga komunizmi. Si një nga të rinjtë që u bë pjesë e kësaj lëvizjeje 22 vjet më parë, kreu i Partisë Socialiste zgjodhi bashkëbisedimin me të rinjtë e pranishëm, përmes të cilit solli kujtimet e ditëve të para të ndryshimit të madh.
“Ne në atë kohë ishim shumë të dhënë pas artit të ndaluar. Një nga librat e ndaluar që solli 8 dhjetori ishte një broshurë e Vaslav Havelit, e përkthyer nga Ardian Klosi, që ne e riprodhonim në mënyrë ilegale. Kam shfletuar dje shumë artikuj të këtij protagonisti të atij momenti për Europën mbarë, i cili e pa veten në anën tjetër të barrikadës, nga një njeri i burgosur për mendimet e lira, në një njeri që u zgjodh president i republikës çeke. Në gjithë fjalime e tij që vijnë pas këtij momenti ka shumë për të kuptuar mbi faktin sesi gjërat nuk shkuan ashtu siç njerëzit ëndërronin kur dolën për të përmbysur regjimin komunist. Megjithatë, ndodhi një ndryshim i madh: njerëzit morën në dorë mundësinë për të vendosur vetë”, tha Rama.
Më tej, ai inkurajoi të rinjtë të bëhen bashkë për të ecur përpara, drejt realizmit të ëndrrave të tyre.
“Varet nga secili prej jush që këtë mundësi ta përdori deri në fund. Asgjë nuk është e pamundur, kur njerëzit e zakonshëm vendosin të përdorin mundësitë që kanë. Këto mundësi janë të jashtëzakonshme kur njerëzit e zakonshëm bëhen bashkë. Pa realizuar ambiciet e mëdha nuk ka hapësirë për ambiciet vetjake. Ne jemi në pikën kur duhet të kuptojmë se shumëçka nuk shkon mirë në jetët tona, sepse shumëçka nuk shkon në jetën e përbashkët. 8 dhjetori ishte dita kur të rinj dhe të reja si ju ndërmorën një hap të rrezikshëm, drejt të panjohurës, askush nuk e dinte se çfarë do të ndodhte. Por sot hedhja e një hapi drejt një rruge të përbashkët është një domosdoshmëri. Sot më shumë sesa atëherë është e qartë se nga hedhja e një hapi të mëtejshëm është një investim i sigurt për të nesërmen, që nuk ka në vetvete rrezikun që kishte 22 vite më parë”, u tha kru i PS-së të rinjve të pranishëm në takim.