Gjiknuri: Sektori energjetik ka akumuluar borxhe të mëdha

Energjia përbën pikën më të dobët të ekonomisë shqiptare. Kështu u shpreh ministri Damian Gjiknuri, gjatë tryezës ku të pranishëm ishin  donatorë të sistemit energjetik. Ministri Gjiknuri tha se  kemi një sektor që vuan nga një deficit i madh monetar, i cili ka akumuluar borxhe të mëdha.

“Kemi kompani, të cilat performojnë të gjitha me humbje për shkak të mungesës së likuiditetit në sektorin e energjetikës”, tha ministri Gjiknuri.

Për përfaqësuesin e Bankës Botërore, Salvador Rivera për të dalë nga kjo situatë, vendit i nevojiten masa serioze nga përmirësimi i treguesve deri tek reformimi i modelit aktual të tregut.

“KESH dhe Kompania e Shpërndarjes janë në gjendje të vështirë dhe nuk ka dyshim për këtë. Disa nga masat e rëndësishme që duhen ndërmarrë janë rritja e arkëtimeve, do të duhet reduktimi i nivelit të humbjeve dhe reforma të tjera në modelin aktual të tregut. Ne mbështesim reformat që Ministria po ndërmerr dhe jemi gati të mbështesim nivelin e investimeve që do të nevojiten”, tha Rivera.
Duke iu referuar rritjes së çmimit të Energjisë, ministri Gjiknuri tha se tarifat e reja nuk do të godasin konsumatorët familjare.

“Kostoja e energjisë të jetë sa më reflektive. Patjetër duke u kujdesur që çmimi asnjëherë mos godasë familjet dhe pikërisht që duam qëndrueshmërinë e cmimit, por duam njëkohësisht që edhe tehun e reformave tona ta orientojmë tek ndalimi i abuzimit me energjinë elektrike”, tha Gjiknuri.

Ndërsa përfaqësuesi i Bankës Botërore kërkoi mbrojtjen e grupeve vulnerabël.

“E vetmja mënyrë përmes së cilës sistemi të funksionojë është ndërhyrje serioze për shërimin e plotë të tij. Jemi dakord që sistemi energjetik në vend do të përmirësohet duke mbrojtur grupet vulnerabël'”, tha Rivera.