Ahmetaj: Do shtojmë vendet e punës. Partneritet publik- privat

Ministri i Ekonomisë, Arben Ahmetaj garanton se viti 2015 do të jetë viti i uljes së informalitetit, i drejtësisë fiskale, i rritjes së investimeve të huaja dhe shtimit të vendeve të punës.

Ahmetaj ftoi sipërmarrjen private të bëhet pjesë e investimeve publike në sektorë të ndryshëm të ekonomisë përmes një bashkëpunimi të ri që është partneriteti publik-privat.

 “Dua të ndalem në një element që, në fakt, përbën risinë e parë të vitit 2015 – Marrëveshjet e Partneritetit Publik Privat (PPP). Prej disa muajsh në Ministrinë e Zhvillimit Ekonomik, Tregtisë dhe Sipërmarrjes po punohet, në bashkëpunim me shumë Ministri, institucione dhe partnerë ndërkombëtarë për të ri-konceptuar procedurat aktuale të koncesioneve dhe të Partneritetit Publik-Privat, në përfitim të qytetarëve”, tha Arben Ahmetaj, Ministër i Ekonomisë.

Duke vlerësuar vitin që sapo u mbyll, Ahmetaj përmendi përmirësimin e klimës së biznesit si dhe hapjes së vendeve të reja të punës.

“Ishte viti i punësimit, mbi 81 000 vende të reja pune janë hapur apo regjistruar në vitin në 2014. Dhe ishte, patjetër, viti i një marrëdhënie krejt të re me sipërmarrjen. Qeveria i shleu, pagoi mbi 360 milionë dollarë borxhe të prapambetura dhe vazhdon, edhe sot që flasim, të paguajë ato borxhe. Ishte viti i ndryshimit rrënjësor të klimës së biznesit dhe investimeve në vend”, vijoi ministri.