Dy persona kanë përfunduar në pranga pasi shtireshin si agjentë të Shërbimit Informativ Shtetëror. Në pranga përfunduan Alfred Kallmi, 41 vjeç, banues në Berat, dhe Antonio Toska, 24-vjeç, banues në fshatin Moravë Berat.
Policia sqaron se arrestimi i tyre u bë pasi ata duke udhëtuar me një automjet tip Benz në rrugën nacionale Berat-Ura Vajgurore, në Moravë, kanë ndjekur nga pas duke i kërkuar të ndalojë automjetin me drejtues shtetasin F.F, 30 vjeç, banues në Durrës.
Drejtuesi i mjetit ka njoftuar Policinë se një automjet me dy persona civilë po e ndiqte nga pas duke i kërkuar të ndalonte.
Menjëherë shërbimet e policisë kanë ndërhyrë duke bërë bllokimin e automjetit së bashku me dy personat, të cilët në momentin e ndalimit nga Policia janë prezantuar si punonjës të Shërbimit Informativ Shtetëror.
Në cilësinë e provave materiale u sekuestruan automjeti tip Benz dhe dokumentet me të cilat pretendojnë se janë punonjës të Zyrës Qendrore Investigative në Tiranë. Materialet i kaluan Prokurorisë së Rrethit Gjyqësor Berat, për veprën penale “Përvetësim të titullit apo të detyrave shtetërore”. /Dita/