Kreu i PSHA: Në koalicionin e majtë për të luftuar nepotizmin, krahinarizmin dhe diskriminimin religjioz

Vëmendja e koalicioneve të 23 qershorit është përqëndruar tek partitë e njohura të skenës politike, por koalicionit të majtë i janë bashkuar ndërkohë parti të tjera, pak të njohura për publikun, por me synime të qarta. Një prej tyre është Partia Shqiptare “Atdheu”, kryetari i së cilës Kreshnik Osmani, thotë në një prononcim për DITA:

“Vijmë në spektrin politik shqiptar në një kohë kur vendi po kalon një fazë të gjatë, të lodhshme e pothuaj anarkike tranzicioni. Ekzistojnë fakte të shumta të cilat tregojnë qartë dekompozimin e brendshëm të shtetit dhe të regjimit i cili nuk respekton ligjin, parimet dhe vlerat. Psikologjia anti-kombëtare po shfaqet dhe synon të injorojë rolin e patriotëve të vërtetë dhe intelektualëve dhe po përpiqet t’i mbajë ata në heshtje duke ua dhënë kështu mundësinë që të dominojnë populistët, militantët dhe avokatët e së keqes. Fenomenet negative si korrupsioni, krimi i organizuar, trafiqet, monopolet, ekonomia informale, kontrolli i mediave, demagogjitë, keqinformimi i opinionit publik etj., kanë shkaktuar  një rreth konfidence dhe një tendencë për të shkatërruar psikologjinë kombëtare. E keqja vazhdon të jetë më e organizuar sesa liria dhe demokracia; ajo është duke menaxhuar shkatërrimin e ekonomisë tonë, moralit tonë, psikologjisë tonë, intelektit tonë…”

Osmani (në foto) është i vetëdijshëm për numrin e lartë të partive, por edhe për vendin e PSHA-së. “Ekzistenca e më shumë se 80 partive politike tregon se shoqëria jonë vuan nga mungesa e organizimit njerëzor. PSHA synon të shndërrohet në një lëvizje mbarëkombëtare. Sipas programit tonë, pjesëmarrja politike duhet të jetë e ekuilibruar dhe në harmoni me larminë religjioze dhe krahinore duke motivuar elitat patriotike të vendit në mënyrë që të parandalojmë krizat, do të luftojmë nepotizmin, krahinorizmin dhe diskriminimin religjioz – thotë ai.

PSHA është ofruar në koalicionin e majtë për 23 qershorin. Osmani shton: “Programi politik i PSHA bazohet në situatën aktuale mbi faktorë kombëtarë shpirtërorë e materialë, në mendime dhe ide intelektuale dhe asistencën e mundshme të aleatëve tanë të mëdhenj: SHBA, BE, aleates tradicionale – Turqisë dhe faktorë të tjerë ndërkombëtarë”.