A do vazhdojë greva e pedagogëve? E vendos nesër Asambleja e FHF-së

Dekani i universitetit të Historisë dhe Filologjisë, Sabri Laci u ka bërë thirrje personelit akademik të marrë pjesë në asamblenë e jashtëzakonshme ku pritet të vendoset për vijimësinë e grevës së pedagogëve.

Universiteti i Historisë dhe Filologjisë dhe ai i Shkencave Sociale, janë të vetmit që vazhdojnë bojkotin e mësimit ndërsa në të gjitha universitetet e tjera mësimi ka nisur të zhvillohet normalisht.

Pas mbledhjes së fundit asambleja e pedagogëve hartoi disa kërkesa për qeverinë dhe u bëri thirrje stafeve akademike që të vazhdojnë grevën.

Ndaj edhe studentët e fakultetit të Shkencave Sociale, presin vendimin e pedagogëve që do të mblidhen sërish nesër në asamble për të vendosur përfundimisht nëse do të futen në grevë, apo do të vijojnë bojkotin.

Ndërkohë që edhe fakulteti i Histori-Filologjisë nuk ka marrë ende një vendim lidhur me vijimin e grevës së pedagogëve.

Duke qënë se ende nuk ka një vendim të qartë nëse greva e pedagogëve do vazhdojë apo jo,  Dekani Sabri Laci ka bërë thirrje për mbledhjen e seancës së jashtëzakonshme të asamblesë së FHF-së, drejtuar personelit akademik të këtij fakulteti.

Shkresa zyrtare nënshkruar nga Sabri Laci:

“Mbështetur në nenin 41, pika 3, të Ligjit nr. 80/2015 “Për arsimin e lartë dhe Kërkimin Shkencor në Institucionet e Arsimit të Lartë në Republikën e Shqipërisë”, si dhe në Nenin 45, pika 3, të Statutit të UT-së vendosa:

Thirrjen e seancës së jashtëzakonshme të Asamblesë së FHF-së, me rend dite: situata në FHF dhe propozimi i zgjidhjeve.

Kërkohet prania e gjithë personelit akademik”

f.h/dita