Meta: Jo çdo impuls i ri është një ministër i ri. Emrat nuk janë më të rëndësishëm

[vsw id=”” source=”youtube” width=”425″ height=”344″ autoplay=”no”]Kryeparlamentari Ilir Meta është për një vizitë në Shtetet e Bashkuara të Amerikës, ku merr pjesë në një forum për sigurinë që zhvillohet në Kongresin e SHBA-ve.

Duke folur për reformën në drejtësi, kryetari i Kuvendit thotë se pritet opinioni i Komisionit të Venecias, për të vijuar me hapat e tjerë siç është diskutimi i gjerë publik. Ai shpreson që të përmbyllet procesi i dekriminalizimit me një marrëveshje përfundimtare si nga mazhoranca ashtu edhe nga opozita. Sipas Metës, draftet e të dyja palëve janë të përafërta në 95%.

“Kanë mbetur fare pak çështje për të cilat mbetet për t’u dakordësuar për ta mbyllur këtë histori sa më shpejt, mundësisht në ditët e ardhshme, jo në javët e ardhshme, në mënyrë që të gjitha energjitë të përqendrohen pastaj tek reforma në drejtësi. Mendoj se dekriminalizimi dhe reforma në drejtësi janë kyçe për çeljen e negociatave me BE”, thekson ai.

Ilir Meta pyetet nga gazetari Denion Ndrenika i “Illyria News” nëse ka vështirësi në marrëdhëniet me Edi Ramën.

Ai thotë se në drejtimet kryesore strategjike, palët janë të dakordësuara dhe debatet e ditës nuk vënë në pikëpyetje këto raporte.

Për sa i përket impulseve të reja, Meta thotë se kjo nuk nënkupton domosdoshmërisht ndryshimin e emrave të ministrave.

“Problemi këtu është se sapo thua impulse të reja, secili mendon që çdo impuls është një ministër i ri, që zëvendëson një tjetër e kështu me radhë. Për ne është i rëndësishëm rezultati i qeverisë. Emrat nuk janë më të rëndësishëm dhe ne padyshim që presim rezultate më të mira”, shton ai. /Dita/