Shërbimi Social Shtetëror i Ministrisë së Mirëqenies Sociale dhe Rinisë ka konstatuar raste të tjetra të shkeljes flagrante të ligjit nëpërmjet abuzimit me ndihmën ekonomike. Raste të tilla janë konstatuar së fundmi në shkallë të gjerë në Komunën e Paskuqanit. Nga kontrolli i ushtruar nga ekipi i auditit të Shërbimit Social Shtetëror në Komunën e Paskuqanit u konstatua se 623 persona përfitonin ndihmë ekonomike në shkelje të kritereve ligjore për përfitimin e saj.
Verifikimet e kryera nxorën me dhjetëra familje që ishin regjistruar si përfituese në skemën e ndihmës ekonomike, të cilët rezultonin të punësuar ose si zotërues pronash përtej kritereve të përcaktuara për personat që duhet të marrin ndihmë ekonomike. “Sipas një vlerësimi paraprak të dëmit që i është shkaktuar buxhetit të shtetit rezulton se vlera shkon deri në 2.759.884 lekë.
Në përfundim të këtij kontrolli, Shërbimi Social Shtetëror ka kërkuar regjistrimin e procedimit penal ndaj administratorëve socialë të Komunës Paskuqan dhe personave të tjerë që mund të rezultojnë përgjegjës gjatë hetimeve. Pjesa më e madhe e denoncimeve për Komunën e Paskuqanit kanë ardhur nga vetë qytetarët, të cilët kanë denoncuar rastet në faqen e internetit www.denonco.al, e hapur nga Ministria e Mirëqenies Sociale dhe Rinisë si një dritare transparence për të gjitha rastet e korrupsionit lidhur me ndihmën ekonomike dhe pagesat e aftësisë së kufizuar. Shërbimi Social Shtetëror vazhdon kontrollet e skemës së Pagesave të Aftësisë së Kufizuar dhe Ndihmës Ekonomike”, thuhet në njoftimin e ministrisë.