Adi Krasta: Ja arsyeja e reagimit tim ndaj TCH

Pas diskutimeve që ka shkaktuar në median online dhe në rrjetet sociale deklarata e tij rreth “planit të televizionit Top Channel për të marrë njërin nga katër networket dixhitale”, moderatori Adi Krasta ka shpjeguar arsyen e këtij reagimi. E intervistuar nga Jonida Shehu për “Natën Vonë” në Ora News, Krasta hodhi poshtë zërat se reagimi i tij ka ardhur i shtyrë nga televizioni ku punon. “Integriteti është i shenjtë. Shqipëria dhe shqiptarët kanë prodhuar neodiktatorë…Kemi pasur kryeministra diktatorialë para dhe pas ‘90, flas edhe për shumë afër. Ka edhe televizione diktatoriale, jo për interesin publik, që po të fuqizohen me interesa monopolistike mund të bëhen të rrezikshme. Do flas sepse kam të drejtën të flas ndaj çdo individi, institucioni apo edhe televizioni që të shet sapunin për djathtë” tha Krasta. Më tej, Krasta shpjegoi edhe atë që ka ndodhur në të shkuarën mes tij dhe televizionit Top Channel.

“Unë jam, mesa duket, natyrë paksa e vështirë. Kam dëshirë që të më lejojnë ta bëj detyrën sipas mënyrës time. Kam pasur një marrëdhënie preferenciale me pronarin Dritan Hoxha, një djalë me një pasion të rrallë, që ka ngjashmëri me Yllin, Sandrin apo Becchettin. Fakti është që ka dashur të bëjë televizion. Tani ka qenë pak difident me ata që kishte poshtë. Unë personalisht kam bërë punë të shkëlqyer në TCH dhe e vlerësoj marrëdhënien e shëndetshme me një institucion, ku ai të shërben dhe ti i shërben atij, Por kur e kupton se duhet një fillim i ri, duhet të largohesh, Unë mendoj se në përgjithësi, TCH ka bërë një sjellje përgjithësisht korrekte me mua, përveç faktit se disa njerëz nuk e përtypën dot logjikën e largimit të këtij njeriu dhe bënë një padi për thyerje të kontratës që unë mendoj se shkoi sikurse ishte parashikuar. Ata kërkuar që unë të paguaj një pagë vjetore kurse gjykata tregoi një realizëm duke më kërkuar të paguaj një pagë javore. Beteja vazhdon. Të gjitha palët duhet të kuptojnë se është një gjë e natyrshme..Një fillim i ri është normal dhe i zakonshëm. Nuk e kam ditur çfarë komenti kanë kërkuar njerëzit, por unë kaq di të them dhe kaq dua të them” tha më tej Krasta. Duke iu referuar shkrimit të fundit të gazetares Elena Martelli të gazetës “La Repubblica” ku shkruhej se “gojët e liga” thonë se “Krasta është yll në rënie”, ky i fundit u shpreh se për të “gojët e liga” janë “gojë torollake”.

“Është e vërtetë. Martelli shkoi në shumë televizione. Më takoi dhe mua  e kemi folur. I gjithë shkrimi është shumë perëndimor, me dinamikë, me një sens të lehtë cinizmi. Aty ajo thotë se “ai ka ikur nga TCH”,  se “gojët e liga thonë se ka rënë nga vakti”… Nuk do të thoja “gojët e liga” se për mua janë “gojë torollake”. Largimin tim duhej ta merrnin me sportivitet…”tha ndër të tjera Krasta. Po ashtu, moderatori i “A-Show” komentoi edhe debatin e zhvilluar pak kohë më parë në median vizive italiane rreth kompjimit të formateve televizive në Itali. Duke u ndalur tek ngjashmëria e studios së tij me atë të “Che Tempo Che Fa” të Fabio Fazios, Krasta tha se kjo çështje nuk duhej marrë kaq seriozisht.

“Becchetti është italian i çmendur, i pëlqen të bëjë zhurmë. Zhurmë i pëlqente edhe Tanit në TCH, i pëlqen edhe Sandrit… Më vjen për të qeshur me seriozitetin me të cilin e morën ata. Gjithsesi, u morën me mua për dicka që nuk e kisha unë në dorë. Nëse skenografia është kopjuar sepse kështu ka dashur njëri, sepse ka qëlluar kështu…atëhere ta pranojmë..” tha Krasta./res

Për më shumë klikoni këtu