ADN-ja konfirmon, vëllai la shtatzënë tetraplegjiken

Thellohet drama në fshatin Lapulec të Mallakastrës. Rezultatet e analizave të ADN-së zbulojnë si baba të fetusit në barkun e 17-vjeçares tetraplegjike A. Z., vëllanë e saj vetëm 13-vjeçar, që njëkohësisht vuan nga probleme shëndetësore, edhe pse jo në atë shkallë sa motra e tij. Prokuroria dhe Policia i kishin ngritur këto dyshime prej tre muajsh kur ngjarja u bë publike, por për të vepruar ligjërisht duhet të prisnin edhe përgjigjet e analizave për atësinë e fetusit. Tani që konfirmimi erdhi, i mbetet organit të akuzës të vendosë se si do veprojë me të miturin, i cili ditën që ka ndodhur abuzimi seksual, duhej që të kujdesej për të motrën tetraplegjike.

Burime nga Mjekësia Ligjore në kryeqytet kanë bërë me dije se pas krahasimit të ADN-së së fetusit që u hoq nga ena e fëmijës së tetraplegjikes me atë të vëllait të saj 13-vjeçar, kanë rezultuar të njëjta, ç’ka përforcojnë deklarimet e vetë të dyshuarit, i cili pasi u pyet disa herë në cilësinë e personit që mund të kishte dijeni mbi ngjarjen, pranoi abuzimin. Historia e incestit u dyshua që në momentet e para prej policisë dhe hetuesve të organit të akuzës, pasi deklarimet e të miturit ishin të paqarta dhe kontradiktore. Gjithashtu, nga rindërtimi i dinamikës së ngjarjes dhe pozicionit të banesës që ndodhej pranë shtëpive të tjera të fshatit, autori dyshohej të kishte pasur mundësi të hynte e të dilte lirshëm në banesën e të dëmtuarës. Këto fakte kanë ngritur që në fillim dyshimet se ka qenë pikërisht vëllai i mitur i vajzës tetraplegjike që ka abuzuar seksualisht ndaj saj duke e lënë edhe shtatzënë. Në deklarimet e tij të fundit, i mituri ka pranuar se disa muaj më parë, në një moment kur ishte ndodhur i vetëm me motrën në shtëpi ka kryer aktin seksual. Ai ka shpjeguar se është shtyrë prej kuriozitetit. Aktualisht i dyshuari është 14 vjeç, por sipas hetimeve akti seksual ka ndodhur në kohën kur ishte vetëm 13 vjeç dhe ligji e ndalon arrestimin e tij. Pavarësisht kësaj, prokuroria pritet të kërkojë masë në gjykatë për të miturin, në Gjykatën e Vlorës me qëllim riedukimin.

Më datë 29 janar të këtij viti, në repartin e urgjencës në spitalin e Fierit ka mbërritur vajza 19-vjeçare me aftësi të kufizuara, që u zbulua shtatzënë në muajin e katërt. Identifikimi dhe zbardhja e ngjarjes në mënyrë të shpejtë ka qenë i pamundur, pasi vajza nuk ka aftësi të flasë. Më tej u ndërpre edhe shtatzënia e vajzës me abort nga mjekët dhe u kryen analizat e ADN-së.