Viktimat më të shumta nga luftimet në Siri, janë civile.
Të paktën 250 mijë persona kanë gjetur vdekjen që prej fillimit të luftës në vitin 2011, ndërsa numrit i shtohen edhe 200 civilë të tjerë të vrarë nga sulmet ajrore ruse.
Në një raport të sajin, Amnesty International, akuzon Rusinë për përdorimin e bombave kasetore në zonat civile dhe thekson se sulmet e tilla përbëjnë krime lufte.
Rusia pretendon se në shënjestër të sulmeve të veta janë vetëm ekstremistët e grupit militant ISIS.
Në raportin e publikuar, Amnesty International, vuri në dukje se është duke i shqyrtuar edhe shqetësimet e ngritura pas sulmeve ajrore të koalicionit të udhëhequr nga Shtetet e Bashkuara.
Shtetet e Bashkuara në shumë pak raste e kanë pranuar vdekjen e civilëve nga bombardimet, sulme të cilat kanë nisur në shtator të vitit 2014.
Amnesty International i ka hulumtuar nga distanca më shumë se 25 sulme që janë realizuar në Homs, Hama, Idlib, Latakia dhe Aleppo, në periudhën 30 shtator – 29 nëntor 2015.
Amnesty theksoi se i ka intervistuar përmes telefonit dëshmitarët që i kanë parë sulmet, si dhe posedon prova audio dhe video e “këshilla nga ekspertët e armëve”. /Dita/