AK ndërkombëtarëve: Ndalni kasapin e votës

Aleanca Kuqezi reagon në lidhje me përpjekjen e maxhorancës aktuale për të zëvendësuar anëtarin e LSI-së në KQZ. Në një deklaratë për mediat, AK kërkon nga institucionet ndërkombëtare që të ndalojnë kasapin e votës që tenton të rifusë vendin në krizë.

“Këmbana e alarmit për mungesën e zgjedhjeve të lira dhe demokratike ka rënë prej kohësh, ndërsa tani gjithçka është kthyer në realitet dhe kasapi i votës së lirë është hedhur me të katërta duart në planin për grabitjen e votave për të mbajtur me çdo kusht pushtetin e kalbur. Vendi rrezikon tashmë jo vetëm respektimin e zgjedhjeve të lira dhe demokratike, por shtetasi Sali Berisha po tenton të rikthejë sistemin diktatorial ku opozita është fiktive dhe jo reale në përpjekjen e saj për të ndaluar shkatërrimin e proceseve demokratike dhe të lira të zgjedhjeve. Aleanca Kuqezi si e vetmja forcë opozitare që ka qëndruar e palëkundur në pozitën e saj kundër çdo akti tradhtie të shtetasit Berisha, i bën thirrje mbarë institucioneve ndërkombëtare që monitorojnë proceset zgjedhore para, gjatë dhe pas ditës së votimit të mbajnë qëndrim jo vetëm përmes deklaratave, por të dënojnë me forcë dhe të parandalojnë kasapin e votës ta rifusë vendin në krizë”, tha në emër të AK, anëtari i saj, Rezar Balla.