Akademia e Shkencave sot voton: Vetëm Gjinushi kandidon për kryetar

Këtë të premte pritet që 44 akademikë t’i drejtohen kutisë së votimit për të zgjedhur kryesinë dhe këshillin ekzekutiv të Akademisë së Shkencave.

Bëhet me dije se proçesi i votimit do të jetë i fshehtë, ndërkohë që ata akademike të cilët nuk do të mund të jenë prezent mund të votojnë nëpërmjet postës.

Gjithashtu, mendohet se proçesin zgjedhor do ta udhëheqi akademiku më i vjetër, në shenjë respekti.

I vetmi kandidat për pozicionin e kryetarit të Akademisë së Shkencave, është Skënder Gjinushi. Reagimet në lidhje me këtë kandidaturë nuk kanë munguar. Në fakt, akademiku Artan Fuga i cilësoi këto zgjedhje të paligjshme pikërisht për këtë arsye.

Fuga tha: “Këto zgjedhje janë të paligjshme, pasi nuk janë në përputhje me ligjin dhe me statutin e akademisë. Pra kjo mase që është marrë me urgjence është një përpjekje për të uzurpuar akademinë, është në përpjekje për të marre pushtetin ne akademi dhe nuk ka lidhje fare me reformimin e saj, është një anti reformë dhe unë mendoj se këto zgjedhje do ta fusin akademinë në një krizë edhe më të madhe”.

Si kandidatura e vetme për postin e kryetarit të Akademisë së Shkencave, akademiku Gjinushi u shpreh se këtë herë është duke u votuar për një alternativë të mbështetur nga politika.

“Pavarësisht që kjo po ndodh edhe në politikë, por sidomos në institucione të ngushta, këtë radhe po votohet për alternativë. Pra nuk është pa kandidaturë, nuk është pa garë, ka një vit e ca që bëhet garë mes një alternativë ligjore, të mbështetur nga komuniteti, të mbështetur nga asambleja, të mbështetur nga Europa dhe një alternativë e cila synon de fakto politizimin e akademisë së shkencave”, tha Skënder Gjinushi.

Edhe për tre pozicionet e tjera që përbëjnë kryesinë e Akademisë së Shkencave, ashtu si në rastin e kryetarit, ka vetëm nga një kandidaturë në garë.

e.ll./dita