Një aksident i rëndë është regjistruar në orët e para të mbrëmjes në rrugën Elbasan-Metalurgjik në afërsi të një karburanti. Një i ri që ishte duke udhëtuar me një motorrçikletë me targa El 547 A është përplasur nga një automjet tip Opel Astra me targa El 1974C i drejtuar nga Ilirian Barja. Edhe pse është transportuar drejt spitalit për të plagosurin nuk ka pasur asnjë mundësi shpëtimi dhe ka ndërruar jetë rrugës. Efektivat e policisë nuk i kanë gjetur asnjë dokument identifikimi të riut dhe kanë bërë transportin e trupit në morgun e spitalit.
Sipas të dhënave të para dyshohet se drejtuesi i motorrit ka qenë me shpejtësi sipas dëshmitarëve të ngjarjes. Drejtuesi i mjetit është shoqëruar në komisariat për sqarime të mëtejshme për aksidentin. Aktualisht do procedohet për shkelje të rregullave të qarkullimit deri në zbardhjen e plotë të rrethanave të aksidentit. Në vendin e ngjarjes ka mbërritur një grup i ekspertizës dhe po punon për dinamikën e aksidentit. Ky segment për shkak të shpejtësisë është edhe një njollë e zezë e aksidenteve në territorin e Elbasanit.