Aksident në SHQUP, dhjetra të plagosur mes demokratëve

Incidenti në SHQUP, dëmtohen në vrap e sipër për të diskretituar Ramën

Pritej vërtet një situatë e tensionuar politike këto ditë, pas krizës me reformën e drejtësisë. Por askush, as gojët e liga dhe as analisti i pavarur Robërim Çeka, nuk e kishte parashikuar rrjedhën dramatike të ngjarjeve. Dhe konkluzioni nuk vonoi të bëhej publik për gjithë shqiptarët: Pjesa dërrmuese e deputetëve dhe funksionarëve demokratë u paraqitën në spitalet publike e private, si dhe pikat ambulatore më të afërta, për t’u kuruar nga dëmtimet, përdredhjet, gërvishtjet dhe shembjet në pjesë të ndryshme të trupit.

Historia, e sqaruar më pas me ndihmën e kamerave të sigurisë në selinë e PD, nisi me kritikat e deputetes Jozefina Topalli ndaj kolegëve të vet dhe drejtuesve të partisë, se nuk po tregohen agresivë sa duhet ndaj mazhorancës së majtë. “Ju jeni lepuj, ju s’bani nji lek, marre ju kjoftë”. Kaq mjaftoi që një stuhi e djathtë të sulej drejt foltores në sallën e konferencave të PD për të kapur mikrofonin. “Sa isha duke e kapur me dorë podiumin, dhe do ta bëja leckë regjimin autokratik të Ramës”, do të pohonte më pas Gent Strazimiri, “kur ndjeva një dhimbje të mprehtë në pulpën e djathtë. Më kishte shkelur Edi Paloka, ndërsa në nofull më erdhi një bërryl i Albana Vokshit”. Rrëfime të ngjashme kishin edhe Edmond Spaho, Oerd Bylykbashi, madje dhe Ridvan Bode. Dikush pa dy dhëmbë, një tjetër me sy të nxira si arushët panda, një i tretë duke çaluar, por të gjithë me një refren në gojë, “Ah Edvini i krimit, ç’më bëre. Tani të erdhi fundi”.

Mësohet se në kohën e dyndjes së deputetëve nëpër spitale, mjekët kishin në duar disa të aksidentuar nga aksidentet rrugore, një grup nxënësish të dëmtuar nga rënia e tavanit të ri, dhe disa gjimnazistë, autobuzi i të cilëve përfundoi nën urën e sapondërtuar nga firma 3Y. Sigurisht që ata u lanë mënjanë dhe mjekët iu përkushtuan parlamentarizmit.