Qendra Xhonatan me mbështetjen e Fondacionit Vodafone Albania organizoi aktivitetin sensibilizues në përkrahje të personave me sindromën down dhe pranimin e tyre në gjirin e komunitetit ku jetojmë.
Me rastin e kësaj dite, Qendra Xhonatan falë mbështetjes së Fondacionit Vodafone Albania zhvilloi nje koncert tek Teatri i Komedisë me pjesëmarrjen dashamirëse të këngëtarëve të mëdhenj të muzikës shqiptare, si: Juliana Pasha, Sidrit Bejleri, Vedat Ademi, Rosela Gjylbegu etj.
Të ftuar të veçantë për të mbështetur nismën e Qendrës Xhonatan drejt një integrimi te fëmijëve me Sindromën Down në jetën e shoqërisë shqiptare, ishin zyrtarë të lartë të Bashkisë së Tiranës, Ministrisë së Shëndetësisë, Ministrisë së Punës dhe Cështjeve Sociale dhe Ambasadës Amerikane, përfaqësues nga Fondacioni Vodafone Albania etj
Të gjithë bashkë u mblodhën në këtë ditë duke pranuar dhe përjetuar që sa të ndryshëm jemi, po aq dhe të njëjtë. Të ardhurat e këtij koncerti do të shkojnë për pajisjen e dhomës së terapisë së zhvillimit të Qendrës Xhonatan me lojëra edukative të posaçme për fëmijët me sindromën Down.
Dita Botërore e sindromës down u themelua në vitin 2006 nga Shoqata Ndërkombëtare e Sindromës Down dhe është ndjekur nga më shumë se 60 shtete deri më sot. Mbahet çdo vit me datë 21 Mars (21/3) për të simbolizuar triplifikimin unik të kromozomit 21, që shkakton këtë gjendje gjenetike. Synimi i ditës është të rrisë ndërgjegjësimin dhe informimin për këtë sindromë, si dhe të promovojë të drejtat e personave të prekur nga sindroma për të jetuar një jetë me dinjitet dhe për të qenë aktivë dhe pjesëmarrës me vlera në komunitetin dhe shoqërinë ku jetojnë.