Alarmi në Uzinën e Ballshit, rrezikohet një Gërdec i dytë?

Në Uzinën e Përpunimit të Naftës në Ballsh ka rrjedhje gazi nga një depozitë.

Alarmin për situatën e rrezikshme e ka dhënë shefja e sigurimit teknik të repartit zjarrfikës të uzinës Brunilda Jahaj, e cila tha se ka njoftuar për këtë situatë autoritetet, pasi forcat e saj vetëm mund të monitorojnë situatën.

“Kemi një rrjedhje tek një sferë e gazit të lëngshëm dhe jemi të detyruar ta ruajmë pasi mund të shpërthejë nga momenti në moment.”

Nëse shpërthen çfarë ndodh?

“Gërdeci i dytë! Është tmerr. Ne nuk kemi mjete për të luftuar zjarrin” thote Jahaj.

Ndërkohë punonjësit e repartit zjarrfikës dhe ata të nënstacionit elektrik të Ballshit iu bashkuan këtë të premte një proteste të naftëtarëve që kërkojnë pagat e prapambetura.

Rreth 800 naftëtarë kërkojnë një zgjidhje nga shteti dhe theksojnë se kompania duhet t’u japë sqarime për të ardhmen e uzinës.

Rafineria e Ballshit e administruar nga një kompani private është mbyllur që në shtator me pretendimin se kompania naftënxjerrëse Bankers Petrolium nuk i furnizon me naftë bruto.

l.h/ dita