Aleanca Popullore: Merr jetë një Parti e re çame nga një grupim prej 12 partish e shoqatash

Një grupim prej 12 partish, shoqatash dhe grupe të tjera interesi të bashkuara nën drejtimin e Lëvizjes Çame, janë grupuar në një parti të vetme me emrin “Aleanca Popullore”, kryetar i së cilës është Artur Dojaka. Aleanca Popullore është regjistruar në KQZ si forcë politike dhe ka nisur sot fushatën, duke prezantuar në Tiranë kandidatin për deputet, Arjan Hamiti.

“Të zhgënjyer nga vorbullat politike që nuk japin rezultate konkrete , duke mos dashur të humbim kohë  të vlefshme politike, ne marrim sot përsipër fatet tona. Të ndërgjegjshëm për kohën ku jetojmë, të vetëdijshëm për instrumentet  kombëtare e ndërkombëtare në dispozicion, vijmë sot jo si demagogët e  radhës,  por si një forcë e aksionit politik dhe forca e arritjeve politike. Në koordinim të plotë me faktorin politik ndërkombëtar, duke vlerësuar këshillat e tyre  të vlefshme dhe duke ndier mbështetjen e tyre, ndihemi sot më të plotë se kurrë”, thuhet në deklaratën e Aleancës Popullore.

“Duke mos humbur kohë në gjetjen e identitetit tonë mes kaheve të politikës shqiptare, por duke pasur si të vetmin kah Shqipërinë, me një mbështetje shumë të gjerë, së pari në komunitetin çam, e të bashkuar pa asnjë paragjykim më të gjithë ata që Atdheun kanë të parin, Aleanca Popullore shpall sot nisjen e fushatës së vet elektorale më synimin e vetëm, fitoren në zgjedhjet e ardhshme të 23 qershorit”, thuhet më tej.

Aleanca Popullore thotë se nuk tërhiqet nga kërkesa për votimin unanim të rezolutës çame në Kuvend. “Në një kohë kur kombi vjen gjithmonë mbrapa interesave politike, kur çështja çame nuk po njeh asnjë përparim, kur vetë Komisioni i Punëve të Jashtme të Parlamentit të Shqipërisë krijon konfuzion duke e vënë shqiptarin e thjeshtë në pozicionin e tij më të vështirë. Konfuzion i paprecedentë në historinë e politikës moderne; vetë institucioni i Parlamentit është i paqartë nëse kemi një rezolutë të aprovuar për çështjen çame apo jo. Nëse dinjiteti ynë kombëtar ka arritur në atë pikë fundore të tijën sa për t’ju shmangur përgjegjësive të momentit, kërkojmë të ringjallim rezoluta të dështuara; kur politika sot nuk ka kurajë qytetare që në një vendim unanim të pranojë me zë të lartë një realitet që ka të bëjë me thelbin e konceptit të kombit shqiptar. Sigurojmë sot mbarë opinionin publik shqiptar që Aleanca Popullore nuk tërhiqet nga kërkesa për votim unanim në Parlamentin e Shqipërisë të rezolutës për çështjen çame. Në një kohë që na ndalojnë në kufi për shkak të vendlindjes, kur nuk gëzojmë dot të drejtën universale të pronës apo kur nuk vendosim një tufë lule në varrin e të parëve tanë, kemi gjithë të drejtën legjitime për të ngritur zërin dhe për të kërkuar të drejtën tonë. Flasim për Çamërinë por nuk mund ta prekim atë.  Folën shumë për Çamërinë, por vetëm sa e përdorën atë. Do t’i kërkojmë çdo çami që sot e ndjen veten të papërfillur, të papërfaqësuar të bëhet pjesë e jona, do të shkojmë këto ditë te ata anëtarë të komunitetit tonë që nuk i bëri kush pjesë të vendimmarrjes dhe i la jashtë çdo benefiti politik e social”.

Në fund, Aleanca Popullore thekson se do të bëjë marrëveshje me çdo forcë që ka në thelbin e përpjekjeve të veta Shqipërinë. “Do të dëgjojmë çdo zë, çdo ankesë, çdo shqiptar që ka sot një ide apo dëshirë. Aleanca Popullore do të ndërtojë marrëveshje me këdo që në thelbin e përpjekjeve të veta ka Shqipërinë”.