Klevis Bitro kallëzohet nga ambasada e SHBA-së

Ambasada e SHBA-së në Tiranë kallëzon penalisht Klevis Bitron, ish-shef i kabinetit të Ministrisë së Punës dhe Çështjeve Sociale, i shpallur në kërkim. Kallëzimi që tashmë i është bashkangjtur dosjes voluminoze të tenderave fiktiv të organizuar vetëm me letër nga Bitro dhe punonjësit e tjerë të kësaj ministrie, po hetohen nga prokurori Ndini Tavani.

Sipas prokurorisë, referuar edhe kallëzimit penal dhe provave të siguruara, i pandehuri Klevis Bitro me anë të dokumenteve të falsifikuara ka aplikuar për vizë në Ambasadën e SHBA-së në Tiranë, për tre persona, duke i prezantuar si punonjës të ministrisë që drejtohej nga Spiro Ksera. Pas aplikimit, ambasada i ka pajisur tre shtetasit shqiptarë me viza amerikane, ku njëri prej tyre është diktuar dhe është deportuar nga SHBA-ja, ndërsa dy të tjerët kanë arritur të hyjnë në territorin amerikan.

Sipas prokurorisë, çdo person që aplikon për vizë amerikane, praktikën e e aplikimit e bënë me anë të internetit, duke plotësuar një formular onlinë. Nga verifikimi IT-së së aplikantit, referuar edhe nga kallëzimi i ambasadës, ka rezultuar se tre aplikimet e këtyre shtetasve, Bitro i ka bërë nga kompjuteri i tij i zyrës, duke plotësuar formularin e aplikimit. Në këto aplikime, prokuroria saktëson se Bitro ka paraqitur të dhëna të rreme dhe dyshohet se këtë veprim e ka kryer për të përfituar shuma të mëdha parash, që kapnin shifrën e 10 mijë eurove për një vizë.

Shkrimi i botuar ne DITA ne 20 tetor 2013

Deri në 10 mijë euro personi!

“Trimeria” e stafit te Kseres me abuzimet ka shkuar deri ne mashtrimin e SHBA-ve? Një zyrtar i lartë i Ministrisë sugjeron që gjatë fundit të vitit 2010, por edhe në vazhdim, mësohet se me nota verbale të Ministrit të Punës, janë dërguar në SHBA persona të cilët nuk ishin zyrtarë të kësaj ministrie.

Në notat verbale të përgatitura nga Drejtoria e Marrëdhënieve me Jashtë, përfshiheshin përkundrejt pagesës që u jepej zyrtarëve të kësaj ministrie (hetuesit po hetojnë lidhjet me vetë Ministrin)  persona të cilët nuk kishin asnjë lidhje me Ministrinë e Punës.

Këta persona sipas dëshmisë në fjalë, paguanin deri në 10 mijë euro personi, për t’u trafikuar drejt SHBA-ve.

Vetëm në fund të tetorit 2010, dy persona (një vajzë e re rreth 27 vjeç nga Elbasani dhe një djalë i ri) kanë marrë vizë ne ambasadën amerikane, sikur të ishin punonjës të ministrisë, gjasme me qëllim pjesmarrjen në një aktivitet që zhvillohej në SHBA.

Si niste trafiku

Gjetja e aktiviteteve që zhvilloheshin në SHBA bëhej nëpërmjet internetit nga Drejtoria e Marrëdhënieve me Jashtë, dhe prej këtij momenti fillonte skema e gjetjes së personave përgatitja e notave verbale, dërgimi në ambasadë si punonjës të Ministrisë etj, pra shitja e vizave amerikane për qëllime përfitimi.

Burime nga Ministria e Punës, tregojnë se këto nota verbale nuk rregjistroheshin me një numër të caktuar në protokollin e Ministrisë (në to bëhej shënimi me numër ekstra), madje në protokoll nuk depozitohej dhe ruhej asnjë kopje e tyre. Gjithë kjo me qëllim që zyrtarët të mos kishin asnjë gjurmë për përfshirjen e tyre në këtë trafik vizash (pasi rregulli kërkon që nëse një shkresë ruhet në protokoll, ajo duhet të jetë e sigluar nga punonjësit që e kanë përgatitur atë). Madje për këta persona janë shpenzuar fonde për udhëtimin, qëndrimin apo ditetat nga buxheti i shtetit, sikur ata të ishin zyrtarë të atij institucioni. Kjo do të thotë që “grupi” i Ministrisë, përveç pagesës për vizën, ka vjedhur edhe fondet e buxhetit të shtetit që janë dhënë me urdhër shërbimet për këta persona.

Personat jo zyrtarë të kësaj ministrie, të dërguar në SHBA me nota verbale të Ministrisë së Punës, mësohet se nuk janë kthyer më në Shqipëri, çfarë provon ekzistencën e këtij aktiviteti të paligjshëm ndërmjet zyrtarëve të saj.

Pikëpyetjet e hetuesve

Nëse zyrtarët e kësaj ministrie pretendojnë se janë “të pastër” pasi nuk kanë firma që provojnë se janë të përfshirë në këtë proces apo të tjerë (siç mund të pretendojë ndonjëri prej tyre) apo këmbëngulin se personat e dërguar në SHBA ishin punonjës të ministrisë, si shpjegohet që ata që kanë vendosur me “dorë të hekurt” për të gjitha udhëtimet në këtë ministri, në këto raste nuk kanë qenë të përfshirë? Apo nëse ata kanë patur dijeni mbi këto nota verbale, si shpjegohet që megjithëse i njihnin mirë gjithë punonjësit e ministrisë, kanë përfshirë në to persona që askush nuk i njihte? Po personat që mund të kenë udhëtuar bashkë me ta (pasi në grupet e udhëtimit ka patur edhe persona që ishin pjesë e ministrisë) si shpjegohet që nuk çuditeshin nga këta “udhëtarë të rastësishëm” që i shoqëronin?

Dietat, qershi mbi tortë

Lidhur me abuzimet për dieta jashtë vendit, gjetja e aktiviteteve në vende të ndryshme të Europës apo të botës, bëhej në të njëjtën mënyrë. Pra, Drejtoria e Integrimit dhe Marrëdhënieve me Jashtë gjente aktivitetin në internet, dhe më tej përgatiste aktet për urdhër shërbimet duke përfshirë në to punonjës të ministrisë, të cilët nuk kanë shkuar kurrë në to.

Ajo që ndoshta duhet të bëjë ministri i ri është të verifikojë në sistemin TIMS, nëse personat që janë përfshirë në gjithë urdhër shërbimet prej vitit 2010, rezultojnë të kenë dalë jashtë vendit dhe të kenë shkuar në këto shtete. Një tjetër verfikim që duhet bërë, është edhe komunikimi që është bërë nga Drejtoria e Integrimit dhe Marrëdhënieve me Jashtë, me organizatorët e aktiviteteve si dhe regjistrimet që janë bërë për këto aktivitete ndërkombëtare. Te gjithë e dinë, që për të marrë pjesë në një aktivitet ndërkombëtar, duhet të ketë një rregjistrim paraprak të pjesmarrësve në to si dhe një ftesë të dërguar nga organizatorët. Nëse nuk ka të tilla prova, kuptohet që kjo ka qenë një skemë e pastër me qëllim përfitimi, vjedhjeje të buxhetit të shtetit, të fondeve të udhëtimit, qëndrimit dhe dietave për personat që “dërgoheshin dhe shkonin” në këto aktivitete.

Po kështu për të gjitha këto udhëtime, në Drejtorinë e sipërcituar të Ministrisë, duhet të kishte raporte nga pjesmarrësit në këto aktivitete, lidhur me çështjet e diskutuara, rekomandimet, zhvillimet për çështje të ndryshme etj. Sipas burimeve nga Ministria e Punës, mungojnë tërësisht këto raporte, pasi nuk e kanë fare idenë se çfarë është diskutuar në to.

8 persona ndanin tortën

Shpërdorimet dhe vjedhjet e fondeve në Ministrinë e Punës, kanë qenë të konsiderueshme edhe për dietat brenda vendit. Mësohet se për një vit, 95% e fondit të Ministrisë i përcaktuar për këtë shpenzim, është përfituar nga vetëm 8 persona, pjesë e “grupit” të z.Ksera. Këta persona kanë shkuar me shërbim brenda vendit, edhe pse pozicioni i tyre nuk kishte asnjë çështje që të justifikonte udhëtimin e tyre në një zyrë vendore në varësi të Ministrisë.

A ishte ministri që i shpërblente pjestarët e grupit me dieta për shërbime brenda vendit, për punët, firmat që ata hidhnin për llogari të tij? Kjo do dalë nga hetimet, por dëshmia nxjerr që ka nga ata punonjës që plot 20 ditë të muajit (!) kanë qenë me shërbim nëpër rrethe të ndryshme të vendit, dhe përveç pagës mujore përfitonin në këtë mënyrë edhe një rrogë të dytë. Thuhet gjithashtu se edhe faturat që provojnë shpenzimin e kryer për fjetje apo udhëtim për udhëtime brenda vendit janë të falsifikuara.

Për këtë do ketë një kontroll të dyanshëm tek subjektet që pretendohet se kanë lëshuar këto fatura, si nga vetë auditi i Ministrisë, ashtu edhe nga organet e tatim taksave, për të provuar origjinalitetin e tyre si dhe që shpenzimi është kryer realisht.”