Anipse mes nesh u futën ca kukumjaçka…

Tërë këtë javën e fundit një popull i tërë po ngrihet dhe po i jep zë vetes j. Po del në rrugë, po proteston pa frikën se dikush i fshehur mbas një dritareje në godinën e kryeministrisë, duke lëvizur perden tinëzisht dhe i frikësuar nga forca e tij, do të japë urdhër të qëllohet mbi të. Pa frikën se ndonjë snajpër, pas atij urdhëri, do të marrë shënjë ata që paqësisht protestojnë ndaj një vendimi që ende nuk është marrë.

Nuk janë shtatë vetë a dhjetë vetë siç shihnim në protestat e mëparëshme pas 21 Janarit dhe para 23 Qershorit, por janë pothuaj me qindra që po ngrenë zërin kudo në mënyrë paqësore dhe po marrin guximin të thonë fjalën e tyre kudo, para ambasadës amerikane (hera e parë kjo), para kuvendit, para kryeministrise, e në sheshe për të mbrojtur të drejtat e tyre dhe të ardhmen e fëmijëve të tyre.

Anipse në mes të tyre u futën edhe ca kukumjaçka, populli shqipëtar qe në gjëndje t’i nxjerrë nga rradhët e veta ato vrasës të ardhur në demostrim nën lëkurën e qaramanit të bezdisur, duke u ngritur kështu jo vetëm kundër ndotjes së ambientit nga prurjet e mundëshme të armëve kimike, por edhe për të ruajtur pastërtinë dhe ndërgjegjen e tij demoktratike nga mbetje helmuese e të rrezikëshme politike që vazhdojnë të përzihen duke ndërhyrë skuthtësisht në jetën e tij, megjithëse ai ju dha një JO të madhe dhe tepër të QARTË më 23 Qershor.
Por kjo nuk e prish faktin që shqipëtarët po ushtrojnë të drejtat e tyre me dinjitet pa frikën se jetojnë më në një diktaturë të zezë që do t’i vriste, që do të çonte policë të veshur civil në mes të tyre, që do t’i fotografonte dhe të nesërmen në vëndin e punës do t’ju duhej të përballoheshin me shantazhet që do t’ju bëheshin për humbje pune n.q.s. do të guxonin të dilnin në një demostratë të tillë përsëri. Përkundrazi, jua rrit edhe më shumë dinjitetin që ata e mbrojtën të vendosur me votën e tyre me 23 Qershor.

Janë mbase qindra milionë dollarë të përfshirë në këtë “katrahurë” armësh kimike që shqipëtarët mund të fitojnë. Por shqipëtarët po i japin të drejtën vetes të mohojnë pranimin e qindra milliona dollarëve që mbase do të mund të rregullonin një mbarëvajtje të momentit të ekonomisë të vëndit me një hap shumë më të shpejtë. Ata, në kuptimin e plotë të fjalës, po pranojnë të kalojnë përmes një rimëkëmbje më të ngadalshëme ekonomike që është më e vështirë për tu përballuar, dhe çfarë është më e rëndësishmja, ata po ngrenë zërin për një jetë më të shëndetëshme, për një Shqipëri më të sigurtë jo vetëm për jetën e tyre të sotme mbi tokën shqipëtare, por edhe të brezave që do vijnë më pas duke lënë mënjanë rehatinë personale të çastit duke i thënë qindra millionave një tjetër JO të madhe. Populli shqipëtar po lë egoizmin e mbijetimit të momentit pas kurrizit, po “shqelmon” të “mirat” e momentit, për një të ardhme më të mirë, për një të ardhme të pastër për brezat që do vinë, dhe këtë po e bën me largpamësinë e një populli të kulturuar. Shqipëtarët nuk po pranojnë të kenë një përmirësim të menjëhershëm ekonomik, por po vlerësojnë më shumë atë që është më thelbësore për jetën e tyre. Dhe kjo tregon një ndërgjegjshmëri mjaft të lartë të një populli të edukuar dhe humanitar.

Populli shqipëtar po proteston dhe kjo të mbush me krenari. Këto demostrata nuk tregojnë dobësi të qeverisë së posa zgjedhur siç mundohen shumë zëra naivë, apo zëra të që vijnë nga errësira, ta paraqesin. Këto demostrata nuk tregojnë se qeveria po dështon. Përkundrazi, këto demostrata po tregojnë se demokracia më në fund ka ardhur në Shqipëri, se Shqipëria po merr frymë lirisht. Se Shqipëria zgjodhi në krye të vëndit një qeveri që i jep mundësinë e LIRISË së FJALËS duke hequr në mënyrë simbolike kangjellat e hekurit që rrethonin godinën qeveritare, duke i dhënë të drejtën të protestojë për të drejtat e saj. Shqipëtarët me votën e 23 Qershorit i dhanë të drejtën vetes të jenë një popull vital që mund të funksionojë normalisht në truallin e tij, që të ketë të drejtë të plotë në qeverisje jo vetëm nëpërmjet përfaqësuesve që zgjodhi, por edhe me zërin e tij të fuqishëm për t’i thënë ndal atyre vendimeve të qeverisë që ai mendon që janë në dëm të tij. Shqipëtarët i dhanë të drejtën vetes më 23 Qershor, që të jenë fuqi aktive në vendimet që merren për të.
Kjo që po ndodh nuk është dështim i qeverisë Rama, përkundrazi, është fitore e popullit shqipëtar që nëpërmjet qeverisë që zgjodhi, i dha fuqi të plota gjithashtu vetvetes.
Me këtë qeveri, populli shqipëtar i ka dhënë mundësi vetvetes të jetë Sovran me të gjithë të drejtat në truallin e vet, dhe këtë rradhë jo vetëm në letër.

Shqipëria po merr frymë lirisht më në fund, dhe po tregon se ka një popull që i di mirë të drejtat që i jep demokracia dhe di si t’i përdorë ato kur ka në krye një qeveri që e zgjodhi vetë pa ndërhyrje të forcave të errësirës, dhe të jetë një popull krenar e me kokën lart, që thotë haptazi me këto demostrime:

Jam antar i barabartë i NATO-s, dhe jo thjesht një numër plotësues i saj.