Roshi: Arrestimi ishte politik, Kuliçaj e ministri Noka më survejojnë

Roshi thotë se arrestimi i tij ka qenë politik, ndërsa akuzon Flamur Nokën dhe Agron Kuliçajn, që e survejojnë.

“Në radhë të parë i kërkoj ndjesë gjithë atyre qytetarëve shqiptarë që u shqetësuan nga kjo ngjarje e zmadhuar qëllimisht, ku unë u vendosa në qendër të vëmendjes publike pa dëshirën time. Së dyti i kërkoj ndjesë gjithë qytetarëve të Kavajës për përgojimin e jashtëzakonshëm të emrit tim si i zgjedhuri me votën e tyre.

Unë nuk kam ushtruar asnjë lloj dhune mbi trajnerin e Tiranës, për të cilin kam pasur dhe do kem respekt si ish-futbollist i shkëlqyer i kombëtares dhe si përfaqësues i një skuadre mike në Kavajë. Kam zbritur poshtë për të qetësuar gjakrat e ndezur nga një gjest i nxituar i trajnerit të Tiranës dhe nuk kam pasur asnjë arsye tjetër. Por megjithatë nuk ndihem mirë që i dhashë një sebep sado të vogël atyre që nuk i zë gjumi që në 8 maj 2011 nga dëshira për të më bërë keq. Konkretisht Sali Berishës, i cili përmes Flamur Nokës dhe Agron Kuliçajt ka organizuar forca të tëra survejimi e provokimi ndaj meje.

Është e qartë se Sali Berisha nuk e gëlltit dot faktin që Kavaja e përzuri me votë në 8 maj pas 20 vjet premtimesh të pambajtura. Ai kërkon të hakmerret me çdo kusht me Kavajën, por në fakt ai me Kavajën nuk lahet gjithë jetën. Ka marrë votat 20 vjet dhe nuk ka lënë gënjeshtër pa thënë në mes të 20 vjet me radhë. Deri edhe sjelljen e detit në Kavajë ka premtuar.

Ndërsa unë i premtoj se në 23 qershor Kavaja do t’ia fusë në hesapin e ndëshkimit me votë edhe këtë burgosje kriminale timen për qëllimin e tij vetëm e vetëm politik. Më 23 qershor Sali Berisha do ta mësojë përfundimisht se Kavaja nuk harron asgjë dhe nga Kavaja ai dhe PD-ja nuk kanë çfarë të marrin më përveç ndëshkimit të merituar për 20 vjet tallje e poshtërime,” tha Roshi.

***

Kryetari i Bashkisë së Kavajës Elvis Roshi ka lënë sot drejtorinë e policisë së Tiranës dhe ka mbërritur në Gjykatën e qytetit të Kavajës ku do t`i komunikohet edhe masa e sigurisë.

Pas 48 orësh në drejtorinë e policisë së kryeqytetit, Roshi është transportuar nën masa të rrepta sigurie drejt qytetit të tij ku pritet që Gjykata të japë edhe masën e sigurisë për të.

Numri një i Bashkisë së Kavajës u arrestua të dielën pasdite pas një konflikti me trajnerin e Tiranës, Nevil Dede. Policia e Kavajës e shoqëroi fillimisht në komisariatin e këtij qyteti, por tubimi i qytetarëve që kërkonin lirimin e tij bëri që të merrej vendimi për dërgimin në Tiranë. Gjatë tubimit të qytetarëve që mbështetën Roshin nuk mungoi dhuna e policisë.
Roshi rrëfen incidentin në Kavajë: Noka dha urdhër për të më arrestuar

“Arrestimi im ka prapavijë politike. Urdhri u dha nga ministri Noka”, thotë kryebashkiaku i Kavajës, Elvis Roshi, i cili u arrestua dy ditë më parë në qytetin e tij, pas konfrontimit me trajnerin e Tiranës, Nevil Dede. Në një intervistë për GSH, Roshi tregon se si nisi konflikti pasditen e të dielës në stadiumin e Kavajës.

“Nuk jam konfliktuar fizikisht me trajnerin e “Tiranës”, Nevil Dede. Ka pasur një veprimtari timen për të qetësuar situatën, pasi trajneri bëri një gjest antisportiv dhe provokues për të gjithë stadiumin. Ngriti grushtin si simbol komunist, për të nënkuptuar se qyteti i Kavajës është qytet komunist”, thotë Roshi.

Kreu i Bashkisë së Kavajës thotë se urdhri për arrestimin e tij është dhënë direkt nga ministri Noka. “Kam qenë prezent në sherrin që ka bërë shefi i komisariatit, Urim Rexhepi me ministrin e Brendshëm, Noka, i cili i ka kërkuar drejtpërdrejt arrestimin tim. Deri në atë moment kam qenë i lirë, në zyrën e shefit të komisariatit duke shpjeguar ngjarjen, pasi jam paraqitur me vullnetin tim të plotë për të dhënë versionin tim për ngjarjen, pasi mësova se ndaj meje ishte bërë një kallëzim. Duket qartë që ka një nxitje politike. Veprimet e policisë nuk kanë spunto ligjore, por kanë shfrytëzuar një situatë të stisur për të diskretituar figurën time, si kryebashkiak i Kavajës dhe si një nga kryebashkiakët më të suksesshëm të vitit të kaluar. Nga analizimi që u bëhet gjithë veprimtarisë së policisë dhe informacioneve që vijnë nga dëshmitarë okularë, duket që trajneri i “Tiranës” është përdorur nga policia për të plotësuar skenarin e hartuar po nga ata”, thotë Roshi për GSH.

“Arrestimi i Elvis Roshit, inskenim politik, Dede u keqpërdor”

11 mars – Arrestimi i kryebashkiakut të Kavajës ka prapavijë politike dhe është kryer në shkelje të plotë të rregullave të ligjeve të vendit. Akuzat vijnë nga avokati i Elvis Roshit, i cili priste që gjatë ditës së djeshme klienti i tij të linte ambientet e drejtorisë së Policisë së Tiranës. Plarent Ndreca tha dje për mediat se “të gjitha veprimet e policisë dhe prokurorisë kanë prapavijë politike. Gjykojmë se edhe trajneri i Tiranës, Nevil Dede është përdorur nga policia për të bërë kallëzimin penal. Arrestimi ka një prapavijë politike dhe ministri i Brendshëm duhet të vërtetojë të kundërt duke publikuar tabulatet telefonike nëse ka kërkuar apo jo arrestimin e Roshit”.

Arrestimi i kryebashkiakut

Elvis Roshi, mbetet në qeli në ambientet e paraburgimit në pritje të masës së sigurisë që do të jepet nga Gjykata e Tiranës. 38-vjeçari, u ndalua nga Policia e Kavajës të dielën në mbrëmje në përfundim të takimit Besa-Tirana 2-1, pasi ndaj tij pati një kallëzim penal nga trajneri i Tiranës, Nevil Dede, i cili e akuzon Roshin për dhunë fizike në pushim të ndeshjes. Pasi qëndroi për disa orë në ambientet e komisariatit të Kavajës, Elvis Roshi u transferua në Tiranë nën masa të rrepta sigurie, pasi situata u tensionua nga tubimi para ambienteve të komisariatit të Kavajës, nga një numër i konsiderueshëm tifozësh, të cilët kërkonin lirimin me çdo kusht të Roshit. Policia njoftoi gjithashtu se në lidhje me këtë konflikt, i cili ka ndodhur në përfundim të pjesës së parë të ndeshjes, janë arrestuar në kushtet e flagrancës edhe 7 shtetas për konsumim të veprave penale të “grumbullimit të paligjshëm”, “mosbindje ndaj punonjësve të policisë”, si edhe “kundërshtim të punonjësve të policisë”.