INFORMALITETI / Arrestohen për korrupsion 7 inspektorë Tatimorë e Rrugorë

Korrupsioni çon në pranga 7 inspektorë të Drejtorisë së Tatimeve dhe Drejtorisë së Transportit Rrugor në Tiranë. Policia e kryeqytetit finalizoi mbrëmë në bashkëpunim me Task-Forcën e Prokurorisë operacionet e koduara “Tatimet” dhe “Taksidari”.

Të arrestuarit janë Gjovalin Cacja, 33 vjeç, Gerta Marku, 27 vjeçe, Kliton Shteku, 32 vjeç, Saimir Sulaj, 31 vjeç, inspektorë të Tatimeve Tiranë, Arlind Shtëpani, 23 vjeç dhe Leonard Dedej, 31 vjeç dhe Saimir Latifi, 29 vjeç, inspektorë të Drejtorisë së Transportit Rrugor në Tiranë.

“Tatimet”

Operacioni i parë është koduar “Tatimet”. Të arrestuarit janë Gjovalin Cacja, 33 vjeç, Gerta Marku, 27 vjeçe, Kliton Shteku, 32 vjeç, Saimir Sulaj, 31 vjeç, të katër inspektorë tatimorë në kryeqytet.

“Nga hetimet e kryera ka rezultuar se këta inspektorë tatimorë, me mosveprime e tyre në bashkëpunim me njëri-tjetrin kanë lejuar funksionimin dhe ushtrimin e aktiviteteve të ndryshme biznesi në rrugën “Naim Frashëri”, pa përmbushur detyrimet ligjore për regjistrimin e biznesit si dhe pagimin e taksave në Bashkinë e Tiranës”, tha policia.

Gjithashtu rezultoi se shmangia e taksave është konstatuar në 50 subjekte të kontrolluara, teksa 10 ishin informalë, teksa kanë shkaktuar edhe evazion fiskal. Policia tha se dyshohet se të ndaluarit nuk kanë vepruar për shkak të ndonjë ryshfeti. Ndaj tyre janë ngritur akuzat “shpërdorim detyre i personave që ushtrojnë funksione publike dhe moskryerja e detyrave nga organet tatimore i kryer në bashkëpunim”.

“Taksidari”

Aksioni i dytë ka marrë emrin “Taksidari”, po në bashkëpunim me Prokurorinë pas disa muajsh hetime. Në pranga ranë Arlind Shtëpani, 23 vjeç dhe Leonard Dedej, 31 vjeç dhe Saimir Latifi, 29 vjeç, të tre me detyrën e inspektorit rrugor pranë Drejtorisë së Transportit Rrugor Tiranë.

“Nga hetimet u provua se të dyshuarit në bashkëpunim kanë kërkuar dhe marrë përfitime të paligjshme nga drejtues të ndryshëm automjetesh të tonazhit të rëndë, në këmbim të mosvendosjes së gjobave, shuma të cilat variojnë nga 1000 lekë të reja, deri në 50 euro për një rast”, thanë burime zyrtare. Policia sqaroi se janë provuar shkencërisht disa prej rasteve me ekspertim grafik. Ndaj tyre u ngrit akuza e “korrupsionit pasiv të personave që ushtrojnë funksione publike, i kryer në bashkëpunim”.

Inspektorët e arrestuar:

Gjovalin Cacja, 33 vjeç, inspektor tatimor

Gerta Marku, 27 vjeçe, inspektore tatimore

Kliton Shteku, 32 vjeç, inspektor tatimor

Saimir Sulaj, 31 vjeç, inspektor tatimor

Arlind Shtëpani, 23 vjeç, inspektor rrugor

Leonard Dedej, 31 vjeç, inspektor rrugor

Saimir Latifi, 29 vjeç, inspektor rrugor