Një punonjës policie në Tiranë është vënë në pranga nga kolegët e tij për plagosje me dashje. Ferdinand Lutfi Shuaipi, 43 vjeç, lindur dhe banues në Tiranë, me detyrë punonjës policie i rolit bazë pranë Drejtorisë së Përgjithshme të Burgjeve është arrestuar pasditen e së dielës, pasi sipas policisë, ai dyshohet ka shkuar në banesën e shtetasit Leonard Qyra në rrugën “Aleksandër Moisiu” Tiranë dhe pas një konflikti për motive të çastit ka qëlluar në drejtim të tij, disa herë me armën e shërbimit, tip pistoletë. Për pasojë, Leonard Qyra ka marrë vetëm një dëmtim të lehtë, për të cilin është dërguar në Spital. Policia ka sekuestruar armën e Shuaipit, një pistoletë “TT”, model 54, e kalibrit 7.62 mm, me numër të stampuar me thellim në trupin e saj 16010238-66. Materialet në ngarkim të 43-vjeçarit Shuaipi do t’i kalojnë Prokurorisë.