Lame shpallet ‘non grata’ në Lezhë

Kandidati për deputet i Lezhës, Eduard Ndocaj tha tre ditë më parë se drejtori i Aluizni-t, Artan Lame ka ofenduar rëndë gratë e lezhjanëve e gjithë shqiptarët.

Tashmë ai është person i padëshiruar në Lezhë. “Ai do të jetë i dëshiruar në këto anë kur të vijë në Lezhë e t’u kërkojë të falur grave lezhjane duke qarë para varrit të Gjergj Kastriotit, shpëtimtarit të kombit Shqiptar”, ka theksuar ai. Bashkë me këtë deklaratë të detajuar ku përcaktohet dhe rituali i ndjesës, Ndocaj ka postuar edhe një foto të Lames ku shkruhej “Non Grata”.

Lame nuk ka lënë pa e komentuar këtë moment. Me ironi ai i është referuar kohës së Skënderbeut. “Rreth vitin 1450 venecianët e shpallën Skënderbeun person non grata në Lezhë, pasi ishin në luftë me të (sa për kujtesë, Lezha nuk ka qenë kurrë e Skënderbeut, por e Venecias e më pas e turqve). 560 vjet më pas, edhe mua po më shpallin person “non grata” në Lezhë. Vërtet që unë nuk jam Skënderbe, por edhe ata që po më shpallin nuk janë venecianë…”, shkruan Lame.

Kjo përplasje erdhi pas një shkrimi të Artan Lames në lidhje me pllakatën e sulltan Sulejmanit në Kalanë e Lezhës ku ndër të tjera shkruante me ironi se “Po bëhet një javë që të gjithë patriotët e stadiumeve i janë lëshuar pllakës së Sulejmanit, duke harruar që gjithë gratë e tyre çdo pasdite ksehasen e qajnë duke parë telenovelat me Sulejman…”.