Dy barazime në dy ndeshjet e djeshme në Kategorinë Superiore, të vlefshme për javën e 21-të. Besa nuk ka mundur të shkojë dot më larg se barazimi 1-1 me Lushnjën, ndërsa Kastrioti dhe Teuta janë ndarë pa gola. Verdhezinjtë ishin në rrugën e mbarë për t’u ngjitur në kuotën e 31 pikëve, po aq sa Laçi e Partizani, por kanë lejuar një gol në fund që u kushton mjaft, në çdo këndvështrim. Pas një ecurie mjaft të mirë në disa javë, skuadra e Artan Mergjyshit arriti të dilte nga zona e ftohtë e ta shihte veten pretenduese për të luajtur në Europa League.
Por, pavarësisht ngjitjes, rreziku është ende i pranishëm në këtë kampionat kaq të ngjeshur në renditje. Pikët e lëna në dy javët e fundit bëjnë që tani Besa të jetë gjashtë pikë mbi zonën e ftohtë, por me një ndeshje të luajtur më tepër, çka do të thotë se distanca mund të ngushtohet. Në këtë aspekt, barazimi i djeshëm në shtëpi me Lushnjën ka qenë një autogol i vërtetë për verdhezinjtë.
Miqtë janë barazuar përkohësisht me Tiranën dhe shpresojnë të përfitojnë sa më tepër nga ndeshjet e sotme, me bardheblutë që luajnë në Vlorë dhe përballjen direkt midis Bylisit e Vllaznisë. Vend-numëro edhe për Kastriotin e Teutën, të cilëve nuk u bën shumë punë pika e vetme që morën dje. Skuadra durrsake u drejtua nga Ilir Biturku, pas shkarkimit të trajnerit italian Roberto Sorrentino. Në formacionin durrsak ishte i pranishëm edhe Tefik Osmani, edhe pse është pezulluar katër ndeshje nga Komisioni i Disiplinës. Në bazë të rregullores, pas konsumimit të gjysmës së dënimit mund ta konvertosh në gjobë gjysmën tjetër, por Osmani ka munguar vetëm në ndeshjen e Kupës, kundër Lushnjës.
Java 21
Dje
Besa-Lushnja 1-1
Berisha 7′ / Trashi 83′
Kastrioti-Teuta 0-0
Sot
Kukësi-Laçi 14:00
Bylis-Vllaznia 14:00
Partizani-Skënderbeu 14:00
Flamurtari-Tirana 17:00
Renditja
N Skuadra P Gol F B H
1 Skënderbeu 41 30:15 12 5 3
2 Laçi 31 24:20 9 4 7
3 Partizani 31 19:15 9 4 7
4 Teuta 30 29:26 7 9 5
5 Kukësi 30 20:20 8 6 6
6 Besa 29 24:23 8 5 7
7 Flamurtari* 26 24:24 8 5 7
8 Bylis 23 19:19 5 8 7
9 Vllaznia 23 26:27 6 5 9
10 Tirana 22 10:18 6 4 10
11 Kastrioti 22 13:21 6 4 11
12 Lushnja 22 19:29 6 5 10
* Flamurtari -3 pikë