Në fjalën e tij në seancën e fundit plenare për këtë vit, deputeti socialist, Taulant Balla, tha se ministrat e qeverisë “Berisha” dhe kryetarja e Kuvendit nuk respektojnë prokurimet publike. Balla theksoi se qeveria po mban në këmbë televizionet dhe gazetat pro saj me lekët e taksapaguesve shqiptarë.
Gjithashtu, Balla u ndal edhe në festat e organizuara së fundmi nga kryetarja e Parlamentit, të cilat sipas tij bëhen me taksat e paguara nga shqiptarët, pa kaluar në prokurime publike.
“Reklamat shtetërore vazhdojnë të mbeten jashtë prokurimeve publike. 17 milionë dollarë për reklama shkojnë tërësisht për të mbajtur në këmbë televizionet dhe gazetat pro qeverisë dhe Sali Berishës. 1.1 milionë dollarë fishekzjarrë blen Majlinda Bregu dhe nuk respekton rregullat e prokurimit publik. Arben Imami vazhdon të shesë skrap dhe në procedurat që aplikon nuk merr për bazë rregullat e prokurimit publik”, tha Balla.