Gjykata e Tiranës ka hedhur poshtë pretendimin e familjarëve të Jamarbër Malltezit, dhëndrit të ish-kryeministrit Sali Berisha, lidhur me deklaratat e deputetit Taulant Balla, për privatizimin e pronave të Sport Klub Partizanit.
Gjykata e Tiranës rrëzoi kërkesë- padinë për shpifje të familjarëve të Malltezit, sipas të cilës, ata kërkonin 100 milionë lekë dëmshpërblim.
Pas vendimit, deputeti socialist ka thënë se ky vendim i hap rrugë hetimit të privatizimit të pronave të Sport Klub Partizanit, një pjesë e të cilave janë marrë pikërisht nga dhëndri i Berishës.
“Vendimi i gjykatës i hap rrugën një hetimi të plotë të privatizimit të Sport Klub Partizanit dhe të pronave të tjera të ushtrisë shqiptare të shitura me vlera qesharake. I bëj thirrje Prokurorit të Përgjithshëm të fillojë menjëherë hetimin për këtë çështje. Provat tona, të cilat ia paraqitëm gjykatës, janë të plota dhe tregojnë qartë abuzimet”, tha Balla.