Presidenti i Republikës Bujar Nishani ka zhvilluar në Presidencë një takim me Kryetarin e Partisë Demokratike Lulzim Basha, në kuadër të konsultave për zhvillimet më të fundit të ndodhura në Bankën e Shqipërisë.
Takimi zgjati për rreth 60 minuta, ndërsa kreu i PD Lulzim Basha, është larguar pa dhënë asnjë prononcim për mediat. Mësohet se në takimin me Kreun e Shtetit, Basha ka paraqitur qëndrimin e partisë më të madhe opozitare për të mos pranuar politizimin apo cënimin e pavarësisë së Bankës së Shqipërisë nga mazhoranca duke zgjedhur si Guvernator një emër nga rradhët e politikës.
Pas kreut të PD, në ambientet e Presidencës ka mbërritur edhe Kryetari i Gjykatës së Lartë Xhezair Zaganjori, i cili gjithashtu po zhvillon një takim me Presidentin, arsyet e të cilit nuk dihen ende.
Ditën e djeshme Presidenti Nishani u takua edhe me kryeministrin Edi Rama si dhe me guvernatoren në detyrë Elisabeta Gjoni.
Gjatë takimit Rama-Nishani të dyja palët diskutuan rreth normalizimit të situatës në institucionin më të lartë financiar në vend, si dhe domosdoshmerinë e sigurimit të një vijimi sa më të qëndrueshëm të punës së Bankës së Shqipërisë.