Basha ia numëron Ramës të bërat dhe të pabërat në vitin 2015

Bilancet e qeverisë që i paraqiti sot kryeministri Edi Rama, kryetari i Partisë Demokratike i përgjigjet me të tjera shifra.

Për Lulzim Bashën, gjatë këtij viti qeveria ka rritur çmimin e energjisë, ndërsa çmimi i naftës mbetet më i larti në rajon.

Gjithashtu, ai thotë se janë rritur taksat, borxhi publik, ndërsa janë ulur pagat dhe pensionet. Basha thotë se 73 kryefamiljarë kanë mbetur papunë. Gjithashtu, kreu demokrat thotë se janë kryer 340 milionë euro për koncesione për oligarkët.

“Largoi 100 mijë shqiptare nga vendi, 200 mijë të tjerë bënë gati letrat, uli ndihmën ekonomike, shëndetësia në kolaps, privatizoi arsimin e lartë publik, kandidoi Bushët, Roshët dhe kriminelë të tjerë për kryebashkiake, emëroi ministrin e Brendshëm ambasador të krimit të organizuar në qeveri, ndaloi me ligj hetimin e vjedhjes se shekullit, pagoi me tendera të drejtpërdrejte nga paratë e gjakut të shqiptarëve ndërtuesit e vilave të tij në Surrel, Dardhë e Durrës”, shkruan Basha.

Ai thotë se Rama u shpall nga OSBE si kryeministri më i pasur me 200 milionë euro pasuri, teksa i kujtoi edhe ekspozitën e pikturave.

“Hapi 5 ekspozita me piktura ne 3 kontinente (duke i nxjerre e futur pikturat kontrabande), arrestoi e burgosi berberë, fermerë, gra me fëmijë 4 vjeçar për kuponin, liroi Prengën, Ndokën, dhe Ndreun duke i bere shantazh drejtësisë, fshehu kërkesën për ekstradim të Mark Frrokut, urdhëroi arratisjen e Arben Frrokut, dekoroi xhelatët e diktaturës, beri ligjin për të burgosur gazetaret dhe opozitën, refuzoi testin e drogës”, tha më tej ai. /Dita/