Basha mbledh aleatët, s’ka vendim të unifikuar për qëndrimin ndaj Parlamentit

Kreu i PD-së mblodhi sot në selinë blu aleatët, për të diskutuar rreth qëndrimit që do të mbahet ndaj Parlamentit.

Burime nga tryeza konfirmojnë se ky takim ka qenë konsultativ dhe nuk ka konkluduar në asnjë vendimmarrje, ndërsa pritet që një tjetër takim të zhvillohet të enjten, pak përpara zhvillimit të seancës parlamentare

Pas takimit, kreu i PR-së Fatmir Mediu është shprehur për mediat se përpara nisjes së seancës plenare të Parlamentit do të merret edhe vendimi nëse opozita do të marrë pjesë ose jo në punimet plenare.

“Do të vendosim së bashku të enjten në mëngjes kush do të jetë veprimi. Nuk pranojmë që të jemi pjesë e një Parlamenti që nuk funksionin sipas ligjit”, tha Mediu.

Ndërsa kreu i PD-së Lulzim Basha u shpreh se në fokus të bisedimeve ishte aksioni opozitar dhe vendimet antikushtetuese të mazhorancës.

“Ne jemi me qytetarët, me ata që janë në fund të fundit  duke ndjerë ditë për ditë në kurrrizin e tyre, në xhepat e tyre hallet e panumërta që po u vërtit kjo qeveri me papërgjegjshmërinë, paligjshmërinë dhe mungesën totale të ndjeshmërisë, pashpirtësinë e saj në vendimet korruptive dhe mosvendimet sa i përket ekonomisë së vendit, papunësisë dhe varfërisë. Po kordinojmë me aleatët tanë aksionin tonë opozitar sa i përket shkeljes së paprecedentë të Kushtetutës, ligjit, rregullores së Kuvendit. Pra sjelljet antiligj, anti kushtetues dhe në thelb anti europian të kësaj mazhorance e cila rekordit të saj të zi në opozitë si bllokuese  e statusit po i vendos një rekord tjetër të zi tashmë si mazhorancë si dirigjente e rrezikimit të aspiratës mbarë popullore të anëtarësimit në Bashkimin Europian. Këto janë çështjet të cilat po diskutojmë dhe në vijimësi do t`ju mbajmë të informuar”, tha Basha.