Basha pret misionin e FMN-së: Oligarkët po e çojnë vendin drejt greminës

Misioni i FMN-së i ardhur në Tiranë ditët e fundit ka zhvilluar sot një takim me kryetarin e Partisë Demokratike Lulzim Basha, ku kreu demokrat ka theksuar se situata ekonomike është dramatike në të gjitha aspektet për shkak të korrupsionit.

Basha tha se shteti është hapur nga një grusht oligarkësh dhe individësh me rekorde kriminale. Sipas kreut demokrat, kjo është arsyeja që mijëra shqiptarë po largohen nga vendi.

“Kjo qeveri e kapur nga krimi dhe nën diktatin e krimit po bën çdo gjë që vendi të gremiset në honet e thella të varfërisë e mjerimit, ndërkohë që është vetëm një grusht oligarkësh pranë kryeministrit të cilët përfitojnë nga afera qindra milionë euroshe në koncensione të errëta të shërbimeve publike, tendera dhe zhvatje të pasurive e aseteve publike”, theksoi Basha.

Tjetër shqetësim i kreut demokrat është edhe rritja e pakontrolluar e borxhit publik dhe rënia dramatike e të ardhurave.

“Vetëm dy vite niveli i borxhi është rritur nga 61% në 72% të PBB në një kohë që qeveria ka mashtruar lidhur me të ashtuquajturat borxhe për fatura të pashlyera. Në më shumë se dy vite nuk kemi pothuaj asnjë investim publik në një kohë që shpenzimet kapitale janë në rangun e rreth 600 milionë dollarëve në vit, por me të cilat deri më sot realizohen vetëm shëtitore me palma, shatërvanë dhe asnjë km rrugë, asnjë shkollë ose spital, asnjë kanal vaditës e kullues”, tha më tej ai.

Pala e FMN u interesua të dijë vizionin e opozitës rreth planeve të fundit të qeverisë për krijimin e zonave të lira ekonomike, planeve të qeverisë për rritje të reja taksash si edhe se si mendonte opozita të vinte nën kontroll rritjen e shfrenuar të borxhit nesër kur asaj t’i besoheshin përsëri fatet e vendit. z.Basha informoi bashkëbiseduesit se vizioni i opozitës shqiptare është i qartë si drita e diellit. /Dita/