Basha: Protesta e së premtes, ngjarje e madhe për demokracinë

Kryetari i Partisë Demokratike, Lulzim Basha, e cilësoi ngjarje të madhe për demokracinë protestën që opozita mbajti të premten e kaluar para Kryeministrisë.

Duke folur në mbledhjen e grupit parlamentar të PD-së, Basha akuzoi kryeministrin Rama se po sulmon me çdo mjet opozitën, e cila denoncoi drogën në sistem.

“Protesta e opozitës ditën e premte,  ishte një ngjarje e madhe për demokracinë dhe protestat do të vazhdojnë deri sa karteli i drogës të largohet përfundimisht. Edi Rama është përgjegjësi numër një i bazave të narkotrafikut, duke shkelur sytë dhe lejuar një situatë të tillë. Po e sulmon me çdo mjet opozitën që denoncoi drogën në sistem. Kjo qeveri ka zgjedhur të sulmojë opozitën dhe jo narkotrafikun.

Rama është kryeministri i një kupole që tallet e zgërdhihet me batutat e tij të dala boje. Protesta, ishte shenja e qartë e një kryeministri të dorëhequr. Rama ishte në ankth, se mos protestuesit e së premtes, mund të bënin të njëjtat gjëra që bënte ai në protesta. Nuk i ka mbetur veç të zgjedhë orën e largimit, sa më shpejt aq më mirë. Largimi i tij është zgjidhje, është fitorja e parë mbi narko-trafikun, largimi i tij është i pashmangshëm”.

Kreu i selisë blu paralajmëroi mbledhjen e parë të aleancës kundër drogës. “Këtë javë, aleanca kundër drogës, do të mblidhet për të detajuar aksione të reja të opozitës kundër drogës. Nuk ka Shqipëri në Evropë me llumin e narko-trafikut, nuk ka zgjedhje të lira kur blihen vota me llumin e parave të pista. Para të pista, zgjedhje të pista dhe pushtet i pisët, është kjo motoja e kësaj qeverie”, tha ai.