“Rama po na pengon partnerin”

Kryetari i Partisë Demokratike Lulzim Basha thotë se pavarësisht dakordësisë për ngritjen e Byrosë së Hetimit, Edi Rama po bëhet pengesë në këtë drejtim.

Gjatë mbledhjes së grupit parlamentar demokrat, tha se Partia Demokratike është dakord me draftin e propozuar nga ekspertët e SHBA-ve.

“Është dita të themi se PD ra dakord me draftin e propozuar nga ekspertët amerikanë për byronë e hetimit, e drejtuar nga Prokuroria, e trajnuar nga qendrat më të specializuara të botës dhe me një mandate të qartë hetimin e korrupsionit në nivele të larta. Kemi 3 muaj që kemi dhënë dakordësinë. Ky zotëri që çirret nga mëngjesi deri në darkë për domosdoshmërinë e reformës në drejtësi pse nuk e jep dakordësinë?

Çfarë e pengon, kush e ka kapur për xhakete, kush jam mban dorën? Forcë e madhe duhet të jetë ndërsa ka 4 muaj që refuzon partnerin tonë strategjik SHBA në një objektiv po kaq strategjik siç është lufta kundër korrupsionit”, theksoi ai.

Basha akuzoi kryeministri Rama se po i shmanget konsensusit për reformën në drejtësi. “Pengesa për reformën në drejtësi e ka emrin Edi Rama. Alibitë dhe alibirat nuk vlejnë më. Korniza është e qartë, Venecia solli opinionin e saj, raportorët erdhën dhe shkuan, ne presim dhe opinionin final por pata e kapjes së drejtësisë nuk do t’ia bëjë vezën e artë Edi Ramës, drejtësia shqiptare nuk do të kapet”, tha ai.