Papërgjegjshmëria, arbitrariteti dhe paaftësia e menaxhimit të qeverisë Rama të financave publike të vendit janë shkak sipas kryetarit të Partisë Demokratike, Basha, të uljes së vlerësimit nga B+ në B për ekonominë e vendit, nga agjencia “Standard & Poor”. “Ky vlerësim negativ është lajm i keq për çdo shqiptar, për ekonominë, sipërmarrjen, investitorët e huaj që operojnë në vend, për të tashmen e të ardhmen e investimeve. Tani po e shohin të gjithë shqiptarët se simboli dhe realiteti i premtimit për rilindje është zeroja”, tha Basha në mbledhjen e grupit parlamentar të PD. Basha ka theksuar se ky do të jetë viti i parë pa rritje ekonomike, pa rritje rrogash e pensionesh dhe pa zhvillim investimesh në vend. “Asgjë e mirë nuk i vjen vendit nëse e lemë qeverinë të këndoje ninullën e rrenave, qytetarët duhet të informohen se ata 6 muaj më parë u mashtruan, në çdo zonë duhet të bëjmë të ditur se qeveria po e fut vendin në një kurth kopalsi ekonomik që do t’i kushtojë çdo shqiptari”,- tha Basha. Kreu i PD-së, ka thënë se të vërtetat i duhen treguar çdo shqiptari, ndërkohë që ka premtuar se PD nuk do të lejojë që ‘Rama dhe të tjerët të fshehin të vërtetat përmes shfaqjeje televizive’.