Basha: Qeveria “Rama” shënoi regres, e papranueshme për BE

Kreu i Partisë Demokratike, Lulzim Basha, akuzon qeverinë për mungesë përgjegjshmërie lidhur me integrimin e e vendit në BE. Në një bashkëbisedim me studentë të një universiteti privat, Basha tha se për procesin e integrimit janë thelbësore proceset e brendshme.

“As s’mund të pretendohet që vendi të ecë drejt BE, nëse secili mbetet në vend apo akoma më keq, ecën në drejtim të kundërt. Më shumë se shitja e produktit shqiptar në kancelaritë europiane kanë rëndësi proceset e brendshme. Është një shtet që s’ka forcë dhe vullnet të mbrojë të drejtat e qytetarëve të vet apo që i shkel sipas oportunitentit. Këto janë nën vëzhgimin e hollësishëm të institucioneve ndërkombëtare, por dhe të qytetarëve shqiptarë. Kemi arritur në një nivel pjekurie politike, kur qytetarët janë në gjendje të dallojnë progresin, stanjacionin apo regresin. Për ne si PD, më e rëndësishmja është konsolidimi i këtyre vlerave, që për fat të keq nuk kanë njohur progres, por stanjacion e në disa raste regres të dokumentuar dhe konstatuar edhe nga partnerët tanë europianë dhe amerikanë. Procesi i integrimin në BE shumë thelbësor, nuk bëhet me shoë dhe shfaqje”, tha Basha.

Lidhur me votën kundër të Holandës apo shteteve të tjera që kanë dyshime, Basha tha se “nuk mjafton të çohen 3 ministra në Paris, kur fjalët nuk përputhen me veprat është vështirë t’i bindësh. Reflektimi duhet nisur nga vetja dhe jo të shikojmë armiq të jashtëm.”

“KE e ka rekomanduar statusin, kur Shqipëria kishte progres, përparim në fushat kryesore, finalizoi me sukses zgjedhjet, rotacionin paqësor të pushtetit dhe një qeveri e re nisi nga puna. Në këto muaj kemi parë një serë ngjarjesh që na kanë vënë në mendime. Prishjen e konsensusit për ligjin e nëpunësit civil, përkundër paralajmërimeve tona se ky hap do të dëmtonte procesin e integrimit evropian të vendit. Jo vetëm që nuk u dëgjuam, por mazhoranca vazhdoi demonstrimin e forcës së numrave. Kjo është e papranueshme për Bashkimin Evropian. Shteti ligjor, demokracia, ku për fat të keq testi i parë i kësaj mazhorance u njollos nga shitblerja e votës në Korçë, pushimet në administratë si dhe një sërë aktesh si ligjore apo nënligjore dhe veprime në terren që bien në kundërshtim me shtetin ligjor dhe demokracinë padyshim janë parë me shqetësim nga vende të BE-së”, u shpreh Basha.

Ndërsa lidhur me nismën e qeverisë për luftën kundër korrupsionit, Basha u ndal në mënyrë të veçantë në padinë ndaj ish-ministrit Imami.

“PD mbështet pa rezerva luftën ndaj korrupsionit dhe është e hapur për të dhënë bashkëpunim të plotë për verifikimin në mënyrë ligjore të akuzave për çdo zyrtar tonin. Por akuzat bazohen vetëm në sensin e hakmarrjes politike. Kjo vetëm luftë kundër korrupsionit nuk është. Tymnajat, retë propagandistike nuk e luftojnë korrupsionin, por shërbejnë si batanije për të mbuluar korrupsionin që po ndodh në nivele të larta”, u shpreh Basha.