Bashkia e Tiranës nis fushatën: Të gjitha rrugët mbyllen në qershor

Tirana është kthyer tashmë në një kantier ndërtimi. Pavarësisht premtimeve të bëra një vit e gjysmë më parë, afrimi i fushatës elektorale duke se po i hap udhë punimeve të reja për rikonstruksionin e infrastrukturës së dëmtuar të rrugëve.

Punimet e nisura së fundmi nga administrata bashkiake njëherësh në shumë rrugë të Tiranës kanë ndikuar në shtimin e pluhurit, duke rritur nivelin e ndotjes. Ndërkohë që po kthehen në një makth për qytetarët të cilëve jo vetëm u duhet të përballen me baltën, por edhe me stresin e pritjes së gjatë si rrjedhojë e trafikut të krijuar.

Janë të shumta rrugët hyrëse në kryeqytet, në të cilat punimet kanë nisur prej disa muajsh, por vijojnë të mbeten të hapura. Nisja e punimeve njëherësh në shumë rrugë po shkakton një kosto të lartë që duhet ta paguajnë qytetarët, të cilët janë të detyruar që çdo ditë të kalojnë përmes këtyre kantiereve të ndërtimit.

Ndër më problematiket situata paraqitet të jetë tek “Tregu elektrik”, tek Rruga e Durrësit, në rrugicat e secilës kanë nisur punimet, por përveç gropave dhe kanaleve të hapura, shumë pak është bërë për mbylljen e tyre. Po ashtu edhe punimet për ndërtimin e  Bulevardit “Petro Nini Luarasi”, vijojnë të jenë të hapura, dhe sipas planifikimeve të bashkisë pritet të mbarojnë në kulmin e fushatës, në nisje të muajit qershor.

Punime tashmë po kryhen edhe në zonën e ish-bllokut, në Rrugën e Dibrës, tek “Siri Kodra”, segmentet që lidhin Rrugën e Durrësit me atë të Kavajës etj. Rrugët në ndërtim, punimet e të cilave kanë nisur që gjatë vitit të shkuar, çuditërisht kanë pothuajse të gjitha një afat mesatarisht 6 deri në 8 muaj. Çka do të thotë se nëse përfundojnë në kohë, qytetarët do të mund të lëvizin lirisht në to në nisje të muajit qershor, kohë në të cilën fushata elektorale arrin dhe kulmin e saj.

Dje bashkia ka njoftuar edhe ndryshimin e qarkullimit të lëvizjes në një ndër akset më të frekuentuara të kryeqytetit. Konkretisht bëhet fjalë për nisjen e punimeve të fazës së dytë të rikonstruksionit të Rrugës së Dibrës, e cila do të shoqërohet me ndryshimin e drejtimeve të qarkullimit të automjeteve, për të cilat bashkia është kujtuar vetëm mesditën e djeshme që t’i bëjë publike për qytetarët. Plani i ri i organizimit të lëvizjes të automjeteve gjatë punimeve do të jetë sipas përcaktimeve që do t’i gjeni bashkangjitur shkrimit.

Drejtimet e reja të lëvizjes në Rrugën e Dibrës, “Barrikadave” dhe kryqëzimit te “Siri Kodra”  

•Ndalohet qarkullimi i mjeteve në Rrugën e Dibrës, nga kryqëzimi me rrugën e “Barrikadave”, deri në kryqëzimin me rrugën “Siri Kodra” (sipas drejtimit të lëvizjes, nga perëndimi në lindje).

•Qarkullimi i automjeteve, autobusëve dhe mjeteve të emergjencës dhe Policisë së Shtetit, në segmentin e Rrugës së Dibrës, nga kryqëzimi me rrugën “Siri Kodra” deri në kryqëzimin me rrugën e “Barrikadave” do të kryhet me një sens lëvizjeje, sipas drejtimit lindje – perëndim.

•Gjatë kësaj faze, stacioni i linjave të transportit urban do të zhvendoset në rrugën “Ferit Xhajko”, para kryqëzimit me rrugën “5 Maji”.

•Ndalohet qëndrimi dhe parkimi në të gjithë segmentin rrugor.