Debutimi i kombëtares shqiptare të basketbollit në eliminatoret e Europianit 2017 ishte një zhgënjim për të gjithë tifozët, pasi edhe pse nuk kishte pretendime, skuadra e Kostandinides, u dorëzua pa kushte ndaj Gjeorgjisë.
86-47 në favor të vendasve u mbyll ndeshja e grupit F e zhvilluar në Tbilisi, një rezultat që përligj atë çka shfaqën ekipet në fushën e lojës.
Gjeorgjianët me yje që luajnë në NBA dhe Euroliga ishin skuadra më e mirë në fushë dhe nuk iu deshën shumë për të vendosur diktatin. Gjeorgjia dominoi në thuajse të gjithë takimin, duke e nisur vrullshëm që në dy periodat e para.
Rivalët e kuqezinjve arritën deri në një avantazh prej 17 pikësh brenda dy fraksioneve të para që më pas e thelluan ndjeshëm.
Rezultati me 39 pikë diferencë, ishte dhe ai final. Ra në sy prezenca e amerikanit të natyralizuar si shqiptar, Rashaun Broadus.