Batutat e Ramës me Nasufin: Nuk merren fonde duke dhuruar hekurishte

Gjatë vizitës së tij në Berat, kryeministri Edi Rama nuk ka mundur dot të mos bënte pak humor me kryebashkiakun Fadil Nasufi.

Shkak për batutat është bërë një medalje bronzi që Nasufi ia ka dhuruar Ramës.

Kryeministri tha se  Nasufi është mësuar me Berishën, që i dilte dhe e priste me shpresën se do merrte ndonjë investim.

“Kur vinte Saliu për fushatë Fadili ishte gjithmonë ai që i dilte dhe e priste.

Vinte dhe shiritin dhe nuk e linte Saliun të kthehej pa i dhënë ndonjë nga këto, se gjithmonë shpresonte që duke i dhënë këto do t’i vinin dhe investimet nga mbrapa.

Po siç e dini, e vetmja gjë që i mbeti nga takimi me Saliun është ky shalli në qafë, ndërkohë që pak, po e sigurtë, është që duke na dhënë ne nga këto hekurishtet e zbukuruara, i hap vetes rrugë për të thënë tani që kemi nevojë dhe për ca investime të tjera”, tha Rama.

“Unë kisha kohë pa përmendur Saliun po e di që ju e doni shumë dhe ai ju do shumë prandaj e përmenda këtu.

Kam shumë dëshirë që këtë kujtim, tani e kam seriozisht, t’ja kaloj zëvendës kryeministrit, i cili në fakt është drejtuesi dhe koordinatori i gjithë programit të rilindjes të qyteteve.

Dhe jo vetëm për këtë, po edhe për faktin se të dy Fadili dhe Niko vijnë nga eksperienca e kryetarit të bashkive, ndërkohë që këta mendojnë se unë e kam harruar atë eksperiencë dhe kështu që mbrapa shpinës time bëjnë ato diskutimet për t’i shtuar fondet Beratit.

Po unë bëj sikur s’kuptoj, po jam shumë dakort në fakt”, vijoi më tej kryeministri.