Bënë thirrje për “luftë të shenjtë”, arrestohen 6 persona në Greqi

Shërbimet sekrete greke kanë ndaluar 6 persona, të cilët dyshohen se janë anëtarë të grupimeve radikale dhe ekstremiste xhihadiste.

Sipas medieve të vendit fqinjë, 6 personat e ndaluar janë me origjinë siriane dhe u arrestuan në vendin e quajtur Faliraqi të Rodosit, një ndër zonat më të frekuentuara prej turistëve në ishullin grek të Egjeut.

Autoritetet konfirmojnë ndalimin e të dyshuarve, por deri tani nuk japin detaje për llojin e operacionit.

Burime lokale thonë se, të arrestuarit u denoncuan prej myslimanëve të tjerë që jetojnë në zonë, pasi sipas tyre ata predikonin xhihadizmin dhe bënin thirrje për “luftë të shenjtë” kundër të pafeve, siç i quanin ata banorët vendas dhe turistët e shumtë të ishullit.

Emigrantët myslimanë që jetojnë në zonë njoftuan policinë, duke njoftuar se të ndaluarit, por edhe emigrantë të tjerë që ende nuk janë arrestuar u bënin thirrje për xhihad dhe rrëmbim armësh, por ende nuk dihet nëse autoritetet parandaluan ndonjë sulm të mundshëm terrorist në territorin grek.

Pas kësaj, në zonë mbërriti një ekip i posaçëm i Shërbimeve sekrete greke, të cilët kryen edhe arrestimin e të dyshuarve, duke i dërguar ata në zyrat qendrore të tyre në Athinë për hetime të mëtejshme.