Berisha barazon veten me Barroson: Rama nervozohet njëlloj nga fjalimet tona

Ish-kryeministri Berisha analizon fjalën e mbajtur dje në Parlamentin shqiptar nga Presidenti i Komisionit Europian, Hose Manuel Barroso. Në një postim në Facebbok, Berisha u jep një interpretim tjetër disa prej pikave kryesore të fjalimit të Barrosos. Madje shton se fjalimi i tij (Barrosos) e nervozoi kryeministrin njësoj si fjalimet që ai vetë (Berisha) mban në foltoren e Kuvendit.

Postimi i plotë

Rama me mimikën dhe grimasat e tij të pakontrolluara reagoi ndaj fjalës së Barrozos njëlloj siç reagon ndaj fjalimeve të mia!

Të dashur miq, në vizitën e tij të dytë në Shqipëri, Presidenti i Komisionit Europian Barrozo do t’u deklaronte shqiptarëve se :

– “udhëtimi i Shqipërisë gjatë viteve të fundit ka qenë madhështor dhe në kushte të vështira”. Në të vërtetë kjo është universalisht e pranuar përveçse nga Edvin Kristaq Rama dhe klika e neo-bllokmenëve në pushtet.

-Vendimi për statusin e vendit kandidat për Shqipërinë është një “vendim historik”, shumë i rëndësishëm”. Pra ky vendim nuk është një pilulë antidepresive, siç e paraqiti për t’i zvogëluar vlerën Edvin Kristaq Rama në emër të etërve te tij, por jo të shqiptarëve.

-“E ardhmja juaj është në BE, angazhimi ynë për këtë të ardhme europiane është i palëkundur”; për BE-në “pakta sunt servanda”, d.m.th. marrëveshjet duhen respektuar; “ne i mbajmë premtimet tona kur partnerët tanë arrijnë progres” dhe se “të gjithë ata që besuan se BE nuk është një partner i besueshëm e patën gabim, nuk patën të drejtë”. Me fjalë të tjera, Barrozo i kujtoi Ramës se ai, pra Rama,nuk respekton marrëveshjet me kundërshtarët dhe se mashtroi kur u tha shqiptarëve se statusi në dhjetor nuk iu dha Shqipërisë për shkak të shumicës së saj myslimane, ekstremit të djathë, apo euro-skeptikëve. Ata që i besuan këto u gabuan.

-Barrozo theksoi se në procesin e integrimit “konsensusi në vend, mes të gjitha partive politike, është thelbësor”. Me fjalë të tjera, pa konsensus nuk ka integrim dhe prishja e konsensusit për votimin e tre ligjeve në Parlament nga Rama bllokoi statusin e vendit kandidat. Fjalën e Barrosos në Parlament Rama e përcolli me nervozizëm, grimasë dhe mimikë të pakontrolluar njëlloj siç përcjell fjalimet në parlament! sb