Berisha bojkoton “Independence Day”, festën e SHBA-ve

Kryeministri në detyrë, Sali Berisha dhe kryetarja e Kuvendit, Jozefina Topalli, kanë bojkotuar ceremoninë e organizuar nga Ambasada Amerikane në Tiranë në nderim të ditës së Pavarësisë së Shteteve të Bashkuara të Amerikës. Ceremonia organizohet rregullisht çdo vit nga ambasada dhe në të marrin pjesë krerët më të lartë të shtetit. Në ceremoni ishin të pranishëm presidenti Bujar Nishani dhe kryeministri i zgjedhur, Edi Rama. Ra në sy menjëherë mungesa e Berishës. Të pyetur nga DITA, burime zyrtare të ambasadës konfirmuan se Berisha është ftuar, por nuk ishte i pranishëm. Nuk i është përgjigjur ftesës së SHBA-ve as Jozefina Topalli.

Të ftuarit, politikanë, gazetarë, përfaqësues të pushtetit lokal, aktivistë të shoqërisë civile dhe qytetarë kanë qëndruar së bashku në oborrin e Galerisë së Arteve në Tiranë nga ora 19 në orën 21 të mbrëmjes së djeshme. Ceremonia u hap me këngëtaren shqiptare Rosela Gjylbegu, e cila këndoi himnin shqiptar dhe amerikan, dhe vazhdoi me trupat e marinsave të Ambasadës Amerikane, që performuan ceremoninë e tyre zyrtare. Formacioni prej 4 vjetësh i marinsave të veshur me uniformën e tyre të plotë, ngre dhe merr flamurin sipas riteve përkatëse. Kjo traditë e hershme e ushtrisë amerikane, nderon flamurin e Shteteve të Bashkuara dhe ata që i kanë shërbyer vendit.

Kunja e Arvizusë me Berishën

Ambasadori Arvizu mbajti nje fjalim per te pranishmit. Sipas burimeve te DITA fjalimi i parashkruar dhe ai i lexuar kane pesuar disa ndryshime te momentit te fundit, ndoshta, per shkak te mungesave te dy prej krereve te shtetit ne ikje, Berisha e Topalli.

Kjo është ceremonia e fundit e 4 korrikut për ambasadorin Aleksandër Arvizu, që do largohet nga vendi ynë pasi i mbaron mandati. Ndoshta publikut shqiptar i kujtohet që përpara ditës së votimeve, kryeministri Sali Berisha tentoi të shesë lajmin e largimit zyrtar të Arvizusë si një largim të parakohshëm. Në Tiranë u hapën fjalë që Arvizu do largohej. Në fakt bëhetj fjalë thjesht për mbarimin e mandatit. Mandatet e ambasadorëve amerikanë në Tiranë janë 3 vjeçarë gusht-më gusht.

Si për t’i kthyer reston thashethemeve të katundit politik të Tiranës për largimin e tij “për shkak të fuqisë së Podestas apo Berishës” sic u përfol para zgjedhjeve, ambasadori Arvizu me sa duket ka vendosur të jetë në Tiranë edhe në… shtator, kur mblidhet sesioni i ri parlamentar i dalë nga zgjedhjet e 23 qershorit ku PD e Berishës pësoi një humbje homerike. “Do jetë nder për mua të ndjek mbledhjen e parlamentit kur të nisë në shtator” – ishin fjalët e Arvizusë.

Fjala e Arvizusë

Ambasadori amerikan ka ironizuar edhe ata që kanë shumë fjalë dhe pak vepra. Ai ka risjellë në vëmendje një thënie të ish-presidentit Uillson 99 vjet më parë. Duke cituar ish-presidentin, Arvizu tha se liria nuk përbëhet nga deklarata të përgjithshme por nga përkthimi i tyre në vepra. Uillson ka thënë 99 vjet më parë: Liria nuk përbëhet me deklarata të përgjithshme, por nga përkthimi i tyre në vepra” u shpreh ambasadori.

“Integrimi vjen më shpejt nëpërmjet bashkimit dhe jo ndarjes”, – shtoi më tej ai, duke iu drejtuar të pranishmëve:   “Faleminderit që jeni bashkuar në 237-vjetorin e SHBA. Dua të përgëzoj për zgjedhjet parlamentare të 23 qershorit. Dhjetëra mijëra shqiptarë shkuan për të votuar. Sinjali i qartë dhe i pagabueshëm tregoi se ata janë të përgatitur për të marrë përgjegjësi”.

Gary Kokalari: “Burri i shtetit” u soll si një fëmijë i zemëruar kur i hiqen lodrat

I pyetur mbrëmë nga ‘Dita’ për bojkotimin nga ana e Berishës të festës së pavarësisë së SHBA-ve (Independence Day), themelues i organizatës së shqiptarëve për një Shqipëri Demokratike në Shtetet e Bashkuara, Gary Kokalari, bëri këtë koment:

“Dërgimi i ftesës është një gjest korrekt nga Ambasada Amerikane, ndërsa refuzimi i ftesës ishte një gjest i gabuar nga ana e Berishës. Kjo është disi ironike: Ai ka shpenzuar aq shumë kohë dhe para duke u përpjekur të kultivojë një marrëdhënie të fortë me SHBA-në, por me këtë veprim Berisha ka fyer të njëjtin vend, të cilit ai u përpoq aq shumë t’i bënte përshtypje. Burrështetasit e vërtetë e pranuan ftesën, por fakti është fakt – Berisha nuk është burrë shteti. Në vend të kësaj, ai ka vepruar si një fëmijë i zemëruar kur i hiqen lodrat e tij…”