Berisha merr në “mbrojtje” Nishanin e Llallën

Deputeti Sali Berisha ka reaguar ndaj ngritjes së Byrosë së Hetimit.

Ai thotë se mazhoranca ka marrë kompetencat e presidentit Bujar Nishani dhe kryeprokurorit Adriatik Llalla.

Sipas tij, kjo për të parandaluar një regjim të ri, duhet nisur lëvizja “Rama ik”.

“Aleanca e Qelbesirave” ngriti Byronë Socialiste të Hetimit. Rama shpallet kryehetues i Shqipërisë! Të dashur miq, Parlamenti i krimit votoi ditën e fundit të punimeve, apo ditën turpit të tij, ligjin për ngritjen, në kundërshtim flagrant me Kushtetutën e vendit, të ashtuquajturës Byro Kombetare e Hetimit, që de facto është hetuesia e Partisë Socialiste, e cila do funksionojë si pushtet paralel i institucioneve kushtetuese të zbatimit të ligjit. 

Ky model nuk ekziston në asnjë vend të botës së lirë dhe sipas këtij ligji, kreu i ekzekutivit, në rastin konkret neo-bllokmeni Edvin Kristaq Rama, bëhet dhe kryhetues i Shqipërisë, duke i marrë kompetencën kushtetuese Prokurorit të Përgjithshem të vendit.

 Ky ligj dhe ky model bie në kundërshtim të hapur me Kushtetutën e vendit, e cila në nenin 148 pika 1 sanksionon se: “Prokuroria ushtron ndjekjen penale si dhe përfaqëson akuzën në gjyq në emër të shtetit”. Por tani e tutje hetimin do ta bëjë paralel dhe në kundërshtim me Kushtetutën edhe Byroja e Hetimit të PS, e cila do përfaqësojë akuzën në emër të klikës Rama – Meta.

Dy javë para votimit të këtij ligji, Rama deklaroi publikisht se ai nuk ishte i lumtur me presidentin e Republikës dhe prokurorin e Përgjithshëm prandaj dhe për t’u lumturuar po merr me ligj kompetencat e presidentit dhe të prokurorit të Përgjithshëm, duke zëvendësuar Prokurorinë e Shtetit me Byronë Socialiste të Hetimit të varur prej tij. Gjate diktaturës hoxhiste, krahas Hetuesisë së Shtetit ishte dhe Hetuesia e Sigurimit të Shtetit e vendosur në Policinë e Partisë që bënte ligjin si pushtet paralel i Hetuesisë së Shtetit.

Qëllimi i parë i ngritjes së Byrosë Socialiste të Hetimit është mbrojtja dhe bllokimi i hetimeve të Prokurorisë së Shtetit të trafikut të drogës, vrasjeve, grabitjes së pasurisë kombëtare nga Rama – Meta, rrethi i tyre i ngushte, ministrat, deputetet, kupola mafioze e mazhorances së sotme. Qëllimi i dytë, po kaq madhor, është goditja nëpërmjet Byrosë Socialiste të Hetimit të kundërshtarëve politik nga Rama – Meta si dhe drejtuesve të institucioneve që kërkojnë funksionimin e shtetit ligjor. “Rama IK” është përgjigja e vetme ndaj klikës në pushtet!!”, thotë Berisha.