Berisha: Kundër dënimit me vdekje, s’kemi mjaftueshëm të vdekur

Kryeministri Sali Berisha, në një takim me studentë, ka komentuar edhe ngjarjen e rëndë, ku një pedofil ka vrarë një fëmijë. Berisha tha se ka marrë shumë mesazhe ku kërkohet kthimi i dënimit me vdekje, por ai shtoi se kjo gjë nuk do ndodhë.

“Kam marrë qindra mesazhe në celular dhe në Facebook, që kërkojnë dënimin me vdekje. Unë kam mirëkuptim për të gjithë ata, sepse ngjarja është tmerrësisht tronditëse, por nga ana tjetër ne jetojmë në një hapësirë evropiane, e cila me vendosmërinë më absolute e ka hequr dënimin me vdekje. Kjo është bërë në respekt të Konventës Europiane të të Drejtave të Njeriut. Shqipëria është vend anëtar i Këshillit të Europës dhe për çdo hap prapa që mund të bëjë, Shqipëria merr përsipër dënimin e saj,” tha Berisha.

Kryeministri shtoi se numri i vrasjeve në Shqipëri është i ulët dhe zbulueshmëria është shumë e lartë.

“Shkalla e zbulimit të vrasjeve dhe shkalla e vendosjes para ligjit dhe dënimit të tyre është nga më e larta që mund të ekzistojë. Vende që e kanë traditën e funksionimit ligjor shumë më të madh se Shqipëria, e kanë numrin e vetëvrasjeve sa dy herë Shqipëria,” tha Berisha.

Në këtë takim kryeministri Berisha ka folur për klimën e biznesit dhe punësimin në vendin tonë.

“Në 4 vitet e ardhëshme do të bëjmë të mundur krijimin e 250 mijë vendeve të punës. Ne jemi të bindur se nëpërmjet reformës së thellë të krahut të punës ne do të bëjmë që rritja jonë ekonomike të ketë një potencial më të madh punësimi. Integrimi europian përbën në vetvete një faktor shumë të rëndësishëm për punësimin e shqiptarëve, jo vetëm për faktin që ky integrim kupton qindramilion euro më shumë nga Komisioni Europian për projekte të shumta por se ky integrim është një pasaportë tjetër e shkëlqyer pas integrimit në NATO, një garanci më e madhe për investimet private në Shqipëri. Ne do të bëjmë gjithçka që ky proçes të eci pandalshëm.”

“Në këtë mandat ne vijmë gjithashtu me një vizion shumë të qartë dhe një numër mjaft të studiuar të punësimeve në bizneset e reja, në bujqësi, në teknoligjinë e lartë dhe në çdo fushë tjetër. Këto 4 vjetë do të jenë vitet e uljes më të madhe të papunësisë në Shqipëri” u shpreh kryeministri

“ I gjithë projekti i punësimit tonë është dyfishimi i investimeve të huaja. Në këtë rast ne do të bëjmë gjithçka për nxitjen e punësimit në industri. Në fushën e ndërtimit të Hidrocentraleve dhe Energjitikës fillojnë projektet më të mëdha në historinë e Shqipërisë. Janë firmosur kontrata me sektorin privat për ndërtimin e 363 hidrocentarleve. Së paku 30 mijë forca pune do të nevoiten në ndërtimin e këtyre projekteve, përfshi këtu edhe punonjësit në projektin TAP. Ne jemi të sigurt se do të dyfishojmë numrin e punonjësve në teknologjinë e lartë. Ne do të bëjmë gjithëçka që Shqipëria dixhitale të ketë së paku 25 mijë të punësuar.

Një nga fushat më të rëndësishme për punësimin mbetet turizmi, prandaj ai mbetet një nga përparësitë tona më të mëdha gjatë viteve që vijnë. 2 parqe logjistike janë në ndërtim e sipër, ato do të punësojnë sëbashku 30 mijë punëtorë. Pas një diskutimi të gjërë me ju ne do të marrim parasysh çdo sygjerim, çdo vërejtje dhe çdo propozim. Potencialet e Shqipërisë janë shumë të mëdha.”