Berisha: Pa gazeta u ndjeva si Robinson Kruzo në ishull

Në ditën e parë të punës për këtë vit, kryeministri Berisha ka ndarë me miqtë e tij në Facebook ndjesinë që të shkakton rikthimi në punë pas festës. Berisha e ka nisur ditën e punës me ironi për opozitën dhe mungesën e gazetave të përditshme.

“Në mëngjes shkova në zyrë. Dita ishte e bukur, vërtet një pranverë në dimër. Hapa dritaren dhe gjatë gjithë ditës nuk u dëgjua as dhe një ciu-ciu. Pyeta këshilltaret e mi se çfarë kishte ndodhur. Më thanë se opozita po fle. Gjumë të ëmbël dhe gëzuar Vitin e Ri opozitë! – thashë me vete – veçse kur të zgjohesh nga avujt e ahengut dhe kumbarit të Vitit te Ri, mos bërtit se fajin për letargjinë e zgjatur e ka Saliu.

Unë e nis ditën me leximin e gazetave, por sot në tavolinën e punës nuk gjeta asnjë syresh. Pyeta Erlën (zëdhënësen time): Ku janë gazetat? Ajo m’u përgjigj se sot nuk ka gazeta, sepse ato ende janë me pushime. Mendova se duhet të falënderojmë dy herë mediat elektronike, si për larminë dhe cilësinë e lartë të programeve të mrekullueshme artistike që ato kishin përgatitur për Vitin e Ri, për të gjitha shijet dhe moshat, ashtu edhe për kronikat serioze të lajmeve nga vendi dhe bota në edicionet e tyre, se po të ishte për gazetat do ndiheshim si në ishullin e Robinson Kruzo. Vetiu thashë me vete: Zoti i ruajtë gazetat tona nga Viti i Ri! Natyrisht, gazetarëve gëzuar!”, shkruan Berisha në Facebook.