Edhe në 1 janar, kur urimet janë kryefjala e ditës, kryeministri Berisha nuk e ka lënë t’i shpëtojë rasti për të bërë një deklaratë politike. Pas vizitës në maternitet, ku çifti Berisha uruan fëmijën e parë të ardhur në jetë për këtë vit, kryeministri u pyet nga gazetarët në lidhje me vitin që e majta e ka cilësuar si viti i ndryshimit. Sipas tij, Shqipëria ka pësuar ndryshim të jashtëzakonshëm, duke dalë në krye të botës për shndërrimin e rritjes në mirëqenie, por ky ndryshim “i ka lënë socialistët te thana”.
“Në fakt, për fatin e keq, ndryshimi ata (socialistët) i ka lënë tek thana, por edhe atyre ju uroj Vitin e Ri, sepse tjetër është problematika politike dhe tjetër është zemra dhe urimi. Ndryshimi është një shpejtësi në Shqipëri e pakrahasueshme me asnjë vend tjetër. Çfarë mund të presë ndonjë më shumë nga ky vend, i cili 20 vjet më parë ishte i famshëm vetëm për lajme të këqija, kur del sot në krye të botës për shndërrimin e rritjes në mirëqenie, për shndërrimin e pasurisë në mirëqenie dhe pozicionohet nga vendet më kryesore”, tha Berisha për mediat.