Kryeministri Berisha i ndjerë nën presionin ndërkombëtar për të zhvilluar zgjedhje të lira dhe të ndershme në vitin 2013, në çdo takim me diplomatë shprehet se është i gatshëm të zhvilloj zgjedhje të standardeve të larta. Ai ishte i ftuar dje në takimin e Komitetit të Ministrave të Këshillit të Evropës ku dhe Shqipëria dorëzoi presidencën e radhës.
Zgjedhjet me standarde
Në fjalën e tij, Berisha ftoi vëzhguesit e Këshillit të Europës për të monitoruar këtë proces. “Viti i ardhshëm vit zgjedhor, duhet të shfrytëzoj rastin të ftoj KiE-në të na nderojë në dërgimin e vëzhguesve të zgjedhjeve të ardhshme parlamentare, qeveria do bëjë gjithçka që të mbajë zgjedhje në përputhje me standardet ndërkombëtare”, deklaroi Berisha, teksa mbajti një fjalë gjatë sesionit të parë të aktivitetit “Diversiteti në Europë”. Presidenti Nishani i pranishëm në këtë ceremoni, deklaroi se gjatë kësaj periudhe Shqipëria tregoi se ka institucione të konsoliduara. “Shqipëria pati mundësi të tregojë në praktikë se institucionet e saj janë të konsoliduara dhe treguan se zotërojnë kapacitetet e nevojshme për të përmbushur me sukses një mandat drejtues siç është presidenca e KiE. I falënderoj institucionet e KiE për mbështetjen e pakursyer që i kanë dhënë Shqipërisë në përmbushjen e këtij mandati. KiE ka luajtur një rol të rëndësishëm në ruajtjen e demokracisë në Shqipëri”, deklaroi Nishani. Në këtë aktivitet morën pjesë përfaqësues të lartë të KiE-së, të 47 vendeve anëtare, vendeve vëzhguese, vendeve fqinje të Mesdheut, përfaqësues të trupit diplomatik të akredituar në Tiranë, si dhe autoritete të tjera të larta.