Berisha: Rama po u bën shantazh medieve

Ish-kryeministri Berisha akuzon kreun e qeverisë për shantazh mbi mediat. Në një postim në Facebook sot në mesditë, Berisha komenton intervistën e mbrëmshme të Ramës në televizion, duke e akuzuar atë për sulm ndaj themeleve të demokracisë dhe fjalës së lirë.

“Për Edvin Kristaq Ramën fajin e kanë mediat!

Të dashur miq, dje, në të gjithë intervistën e tij, Edvin Kristaq Rama hoqi maskën dhe u vërsul me urrejtje të paparë ndaj mediave, të cilat sipas tij ishin tashmë fajtore direkt për fjalët prej halabaku ordiner si: maskara, rrot k… që kishte regjistruar mikrofoni i tyre në seancën parlamentare, mbasi ato ai i kishte thënë duke folur me vete dhe kundër askujt.

Mediat ishin fajtore për informacionin me të cilin faktonin se Rama ka mashtruar për legalizimet falas, pasi sipas tij ato do bëhen falas pavarësisht se qytetarët do të paguajnë sa trefishi i shtëpisë tokën. Mediat e kishin fajin se kishin regjistruar në tre muajt e fundit 30 raste eksplozioni me tritol, mediat pra kanë zëvendësuar si fajtor, ndonëse jo plotësisht, Sali Berishën. Madje mediat e kishin fajin se numri i të vrarëve në tre muajt e fundit, sipas faqes zyrtare të ministrisë së brendshme, ishte më i larte se në të njëjtën periudhë të një viti më parë.

Ky është një shantazh i paskrupullt dhe i dënueshëm ndaj mediave. Në 23 vite pluralizëm kurrë ndonjëherë më parë nuk ka ndodhur që një kryeministër të nisë dhe sosë intervistën e tij me moton “fajin e kanë mediat”. Unë dje denoncova në Parlament qëndrimet e tij maniakale ndaj pronarëve, drejtorëve, gazetarëve, shantazhet e paskrupullta deri në kërkesat ultimative të heqjes së këtij apo atij lajmi, kronike, shkrimi, editoriali e madje drejtuesi, kryeredaktori gazete apo televizioni.

Të dashur miq, me sulmet e tij prej të sëmuri psiqik ndaj mediave, Rama po sulmon themelet e demokracisë, fjalës së lirë. Vetëm protesta e përgjithshme popullore është përgjigja e merituar ndaj revanshit të tij kundër lirisë së fjalës! Sb”, shkruan Berisha.