Ylber Dogjani emërohet drejtori i ri i Inteligjencës së Mbrojtjes

Gjenerali Ylber Dogjani është emëruar dje drejtor i Përgjithshëm i Agjencisë së Inteligjencës së Mbrojtjes, ose i njohur ndryshe Shërbimi Informativ i Ushtrisë. Emërimi i Dogjanit erdhi dy ditë pas shkarkimit nga detyra të kolonel Ilirian Balliut. Ky i fundit u shkarkua nga kryeministri Berisha, me argumentin se nuk kishte gradën e duhur për postin që mbante. Dje Presidenti Bujar Nishani ka firmosur propozimin e ri të Kryeministrit në detyrë, duke emëruar drejtorin e ri të Shërbimit Inteligjent të Ushtrisë, Ylber Dogjani, i cili më datë 24 qershor ka marrë gradën madhore “Gjeneral Brigade”, me propozim të ministrit të Mbrojtjes, Arben Imami. Zgjedhja e drejtorit të SHIU-t sipas ligjit të vjetër bëhej me propozim të Kryeministrit dhe miratohej nga ministri i Mbrojtjes, por me ndryshimet e reja të ligjit institucioni mori emër tjetër dhe drejtori i Përgjithshëm emërohet me dekretin e Presidentit. Me këtë lëvizje “blic”, kreu i qeverisë në detyrë, Sali Berisha, i heq mundësinë Partisë Socialiste që të bëjë ndryshime në strukturën e Shërbimit Inteligjent të Ushtrisë, pasi emërimi i ri do të kërkonte kundërfirmën dhe dekretin e Presidentit Nishani.

Berisha vijon firmosjet, shkarkon shefin e Zbulimit të Ushtrisë

Kryeministri Berisha ka shkarkuar dje nga detyra drejtorin e Agjencisë së Inteligjencës së Mbrojtjes, Ilirjan Balliu. Burime zyrtare i thanë pardje gazetës “Panorama” se një nga shkaqet e shkarkimit të Balliut nga funksioni që mbante është mospërputhja e gradës së tij me pozicionin e punës. Zyrtarët pohuan se drejtuesi i Agjencisë së Inteligjencës së Mbrojtjes, sipas ligjit duhet të ketë gradën “Gjeneral”, ndërsa Balliu mbante gradën e kolonelit. Pas shkarkimit nga detyra të kreut të Inteligjencës së Mbrojtjes, ka nisur procedura e emërimit të drejtorit të ri të kësaj agjencie, emërim i cili bëhet me propozim të kryeministrit dhe me dekret të Presidentit të Republikës. Referuar gradës që kërkohet për funksionin në fjalë, bëhet e ditur se kreu i ri i AIM mund të jetë një nga katër gjeneralët e dekretuar pak kohë më parë nga Presidenti i Republikës, Bujar Nishani. Në faqen zyrtare të kreut të shtetit, në seksionin e dekreteve, ndodhen njoftimet përkatëse të ngritjes në gradën “Gjeneral brigade” të katër kolonelëve: Piro Ahmetaj, ish-zv.shef i Shtabit të Përgjithshëm, Frederik Beltoja, ish-komandant i Forcës Ajrore, Ylber Dogjani dhe Muhamet Buçpapa, ish-komandant i Forcës së Mbrojtjes Rajonale. Kandidati kryesor për drejtimin e Agjencisë së Inteligjencës së Mbrojtjes është pikërisht njëri nga katër gjeneralët e graduar një javë më parë presidenti. Ndryshimi i kreut të Shërbimit Sekret të Mbrojtjes është shkarkimi më i rëndësishëm i firmosur nga Kryeministri Sali Berisha pas zgjedhjeve të 23 qershorit 2013.