Gjatë takimit në Universitetin e Durrësit, sot paradite, kryeministri Berisha u shpreh se qeveria do të bëjë gjithçka për të realizuar punësimin e të rinjve. Berisha tha se të rinjtë janë në krye të axhendës së PD-së. Sipas tij, pasi qeveria u plotësoi të gjithë të rinjve ëndrrën për t’u shkolluar, tashmë do të bëjë gjithçka për t’u garantuar atyre punësim menjëherë pas mbarimit të universitetit.
“Ne kemi krijuar mundësinë që secili të ndjekë universitetin, i dhamë fund arbitraritetit zyrtar ndaj ëndrrës së tyre universitare. Hapi tjetër, çdo e re duhet të ketë të drejtë që dijet që mori të ndërtojë projektin e jetës, e të ardhmes, në këtë kontekst do bëjmë gjithçka për krijimin e vendeve të punës, përshtatjen me tregun e punës. Arsimi profesional është vendimtar”, tha ai.
Berisha u shpreh se universitetet e reja në disa qarqe të vendit duhet të shërbejnë si promotorë të zhvillimit rajonal.
“Ne kemi universitete në shumicën e qendrave të qarqeve. E vërteta më e madhe e tyre është se roli i tyre më kryesor duhet të jetë zhvillimi rajonal, promotorë të fuqishëm të zhvillimit rajonal. Territori i një qarku në kompleksitetin e tij është sa vendi në tërësi dhe potenciali më i madh për të kontribuar është rajoni ku je. Do bëjmë çmos të orientojmë universitete drejt këtyre profileve”, tha Berisha.